Эм иги тепсегенни сайлагъандыла

Кёп болмай «Таврида.АРТ»  фестивальны баш сахнасында кавказ тепсеулени номеринден къуралгъан батлда  миллет кийимлени, маданиятны эм  тепсеулени энчиликлери бла шагъырейленирге онг табылгъанды. Анга Россейни жети регионундан:   Къабарты-Малкъардан, Къарачай-Черкесден,  Дагъыстандан, Ингушетиядан, Шимал Осетиядан эм Чеченден коллективле эм энчи тепсеучюледен жюзге жууукъ адам  къатышханды.

 Хар номер да кесича сейир болгъанды, кёлню кётюрген тау макъамла  уа къараучуланы Кавказ таулагъа алып кетгендиле дерча эди.   Эришиулени къурагъанла номерле телевиденияда шоулагъа ушарына уллу къыйын салгъандыла. Конкурс эки тюрлю номинацияда ётгенди. Биринчисинде коллективле сынашхандыла, башхасыннда  уа энчи тепсеучюле.  
 

Къараучула къол кётюргеннге кёре, «Король лезгинки»,тюзюн айтханда уа, «Королева»  даражагъа Шимал Осетияны жаш тёлю комитетинде   халкъ  тепсеу ансамбльни солисткасы Майя Беставашвили тийишли болгъанды.  

 - Кертисин айтханда, жангыз  тепсегенлени арасында  къызладан кесим болгъаным  ючюн ийменмезге  тынч тюйюл эди. Сахнагъа чыгъардан алгъа кёп сагъыш  этгенме. Болсада, таукеллигим хорлап, алгъа атлам этгениме бек къууанама,- дейди Майя.

Коллективлени арасында уа хорламгъа  Чеченден Бейбулат Алиев башчылыкъ этген  «Башлам»  жаш тёлю тепсеу къауум тийишли болгъанды.

- Бизни номерибизни жаратханларына бек ыразыбыз. Барыбыз да  жарсыгъанлай тургъанбыз,  бютюнда  сахнагъа чыкъгъанда.   Болсада артист къайсы болумдан да чыгъа билирге керекди. Тепсеген къауумланы бири къалмай кеслерини ахшы  усталыкъларын кёргюзталгъандыла. Фетивальны бек жаратханбыз, ол болмагъанча аламат къуралгъанды. Болсада анга  алгъадан тири  хазырланнганыбыз бизге саугъа этгенди. Экинчи жылда да Тавридагъа келирибизни  ашыгъып сакъларыкъбыз,-деп къошханды  Бейбулат Алиев да.
 

Конкурсну ахырында  хорлагъанла жети номинацияда  белгиленнгендиле:  «Иги тепсегенлерине эм аламат художестволу образлары ючюн» Дагъыстандан Темирхан-Шура фольклор-этнография къырал тепсеу ансамбль,  «Музыкаларына, артистизмлерине эм уста номерлери ючюн» Шимал Осетиядан халкъ тепсеу   ансамбль,   «Миллет культураны айнытыугъа къыйын салгъанлары ючюн» Ставпропольдан «Горец» кавказ тепсеу студияны келечилери, «Миллет тепсеулени сакълаугъа уллу къыйын салгъанлары ючюн» Къабарты-Малкъардан  «Кабардинка» къырал академия тепсеу ансамбль, «Тау адетге къаты бола билгенлери ючюн» Чечен Республикадан  «Башлам», «Эртте замандача тепсегенлери ючюн» Ингушетияны къырал халкъ  ансамбли, «Тепсеуде адетни ачыкълай билгенлери ючюн» Къарачай-Черкес Республиканы къырал филармония тепсеу театры.

«Таврида.АРТ» фестивальны  «Короли лезгинки» батлына жораннган кесеги эм сейирледен бири болгъанды дерчады. Къараучула тепсеулени кёргенлеринден  сора да, Шимал  Кавказны миллетлерини маданиятлары бла шагъырейленирге да  онг тапхандыла.