Нальчикге къайтып келирге нек кереклисин ачыкълагъанды.

Марина Шушарина Нальчикге узакъ Каргополь шахардан келген эди. «Моя провинция» деген журналист конкурсха ол «Сельская правда» деген район газетни атындан къатышханды.

Алгъаракъда билдиргенибизча, фестивальгъа келгенлеге 3 номинацияда усталыкъларын ачыкъларгъа тюшгенди. Марина Шушарина бу эришиуде энчи дипломладан бирине эм «Репортаж с колёс» номинацияда 3 жерге тийишли болгъанды.

Аны «Пять причин приехать в Нальчик, или путевые заметки журналиста из Кургана» деген публикациясы Къабарты-Малкъарны ара шахарыны эм аламат ариу табийгъатыны юсюнден эди.

«Одноклассники» социальный сетьдеги энчи бетинде журналист бизни жерибизни ариулугъуну юсюнден жазады. Ол анда дагъыда «Балкария»  ансамблибизни усталыгъын белгилейди. КъМР-ни сыйлы артисти  Къудайланы Ахматны къамала бла тепсеую бла видеону уа басмалап, узакъда жашагъанла да кёрюрча этгенди. Роликге къарагъанланы саны уа мингле бла саналады.

- Къысхасын айтханда, отпускуму былай зауукълу ётдюргениме бек къууанама, - деп белгилейди ол.

Андан сора да, фестивальда болгъан башха номинацияланы белгилей, журналист СССР-ни заманында атлары кенг белгили дикторла Евгений Кочергин эм Алла Данькодан мастер-классланы  юслеринден энчи айтады.

Дагъыда ол Долинскде орналгъан таулу жюн базарны энчилигин белгилерге да унутмагъанды. Таулу тиширыула жюнден эшген аламат ариу эм жылы затла ол жашагъан сууукъ  жерледе бек керек боллукъларын эсге ала, Марина  Григорьевна аланы сюйюп сатып алгъанды.

- Быллай сейир учуз багъаланы сиз бир жерде да кёрлюк тюйюлсюз. Сатылгъан затланы энчиликлери уа хар кимни да жюрегине жол табарыкъдыла, - деп белгилейди журналист.