Жарыкъландырыучула

КъМР-ни 100-жыллыгъына

Бу сурат 1957 жылда Къашхатауда алыннганды. Анда олтургъанла (солдан онгнга) школну директору Шауаланы Миналданды,  Фёдор  Яковенкоду, Насталаны Сохтады эмда устаз Роза Сергеевады. Сюелгенле уа ол заманда тамата классланы окъуучуларыдыла. Бизни бюгюннгю хапарыбыз а Фёдор Михайлович Яковенкону юсюнденди. 

Ол  Къашхатауну мектебине 1912 жылда  башчылыкъ этгенди. Ол заманда анда  башланнган билим берген эки класс бар эди. Алада орус тилден дерслени Фёдор Михайлович кеси бергенди. Орус тилни билмеген, ангыламагъан таулу сабийлеге ол предметден окъутуу тынч болмагъаны баямды. Алай ишине уллу сюймеклиги, таулу сабийлеге билим берирге итинмеклиги сынаулу устазгъа  не чырмауну да хорларгъа болушхандыла.

Ол тауча билмегенди, аны себепли дерсин ангылатыр ючюн,  окъутурукъ темасына кёре юй жашауда хайырланылгъан затланы келтиргенди – аякъ, къашыкъ, табакъ, элек, таба, балта, салта, бичакъ, челек дегенча адырланы эм башха затланы.  Къысхасы, оруслу устаз таулу сабийчиклеге хар харфны, сёзню, айтымны уллу тёзюмлюк бла, огъурлу ниет бла ангылатханды. Аны ол мамыр ишин Граждан уруш бёлгенди – устазгъа къолуна сауут алыргъа тюшгенди.  Фёдор Михайлович жигерлиги ючюн Къызыл Байракъны ордени бла да саугъаланнганды.

Урушдан къайтхандан сора да, аламат педагог Къашхатауда бир ауукъ заманны таулу сабийчиклени окъутханды. Артда ол Пятигорск шахаргъа кёчгенди. 1957 жылда Къашхатауну орта школуну устазларыны бла окъуучуларыны бир къаууму Яковенкону юйюнде къонакъда болгъандыла. Ала эл багъалы кёрген эмда сюйген педагогга республиканы, районну, элни жашауларындан, ишлеринден да кёп хапар айтхандыла, устазларын къонакъгъа да чакъыргъандыла.

Кёп да бармай Фёдор Михайлович Къашхатаугъа келгенди, сохталарындан ол заманда сауларына тюбегенинде бек къууаннган эди.  Аланы арасында Насталаны Сохта да болгъанды. Устаз, окъуучула да ол кюнледе кёп затны эсге тюшюргендиле, бир бирлерине хапар айтхандыла. Бу сурат ма ол заманда алыннганды.

Юсюпланы Галина.
Поделиться: