Хатаны сылтауу - уллу кёллю болуу

Юсюбюздеги жылны аллындан бери республикада эсепге 511 от тюшюу алыннганды. Аладан 113-сю жашау журтлада болгъанды. Къургъакъ хансны кюйдюрюу бла байламлы – 200-сю. Онтёрт адамны жанларын сакълар онг болгъанды, 613-сюн а - къутхарыр. Саулукъларына заран тюшгенлени саны 21-ге жетгенди. Жарсыугъа, 10 адам а ёлгендиле. Сакъланнган мюлкню багъасы 740 миллион сомгъа жетеди.

РФ-ни МЧС-ини КъМР-де Баш управлениясыны пресс-службасындан билдиргенлерине кёре, от тюшюулени асламы адамланы эссизликлеринден болады. Ала белгиленнген жорукълагъа уллу кёллю боладыла. Жылыу берген приборланы хайырланыуда ала бютюн кёпдюле.

Эсигизге салайыкъ, 8 июньдан башлап «РФ-ни административ жууаплылыкъ бла байламлы кодексине» тюрлениуле кийирилгендиле. Аны бла тийишлиликде тазирлени саны бир ненча кереге ёсгенди. Сёз ючюн, къургъакъ хансха от салыу бла байламлы тазир 3 мингден 15-ге дери кётюрюлгенди. Быллай тюрлю жууаплылыкъгъа жылны аллындан бери 33 адам тартылгъанды.

Унутмагъыз, аллай отну тыйгъан алай тынч тюйюлдю. Ол юйлеге бек терк кёчюп къалады.  Дагъыда бузукъ электропроводканы да хайырланыудан да хата чыкъмай къалмайды. Битеу бу затланы эсге ала, хар бирибиз да жууаплыбыз гитчеле, къарыусузла къыйын болумгъа тюшмезлерине.

 

 

Къасымланы Аминат.
Поделиться: