Тау тёппеге Кугультиновну атын атаргъа чакъыргъанды

Эсигизде эсе, бир жыл мындан алгъа КъМР-ни Альпинизм, таугъа ёрлеу эм спорт туризмден федерацияны таматасы Ёлмезланы Абдул-Халимни болушлугъу бла Къалмукъ Республиканы Башчысы Бату Хасиков Минги тауну тёппесине кётюрюлген эди. Андан сора да, бу региондан Басхан ауузуна келип солургъа, Европаны тёппесине чыгъаргъа сюйгенле аз тюйюлдюле. Тюзледе жашагъан адамлагъа таула жомакълы дунияча кёрюннгенлери сёзсюздю. Сёз ючюн, 72-жыллыкъ врач Валерий Хонинов жашауунда Минги тауну тёппесинде 11 кере болгъанды.

Ёлмез улу къалмукъ халкъгъа уллу хурмет этеди. 2011 жылда Эверестге экинчи кере ёрлегенинде, ол анда бу республиканы байрагъын да кётюрген эди. Май айда Элбрусда бардырылгъан эришиуледе къалмукълу спортчула ахшы кёрюмдюле болдургъандыла.

Абдул-Халим чертгенича, бюгюнлюкде регионну таматасы альпинизмни айнытыугъа аслам эс бёледи. Энчи юлгюсю бла ол жаш тёлюню саулукълу жашау бардырыргъа чакъырады.

- Барыбыз да билгенден, закий Къайсын белгили къалмукълу назмучу Давид Кугультинов бла къаты шуёхлукъ жюрютгенди. Бир жол ол бери къонакъгъа келген тенглери  Чингиз Айтматовха, Мустай Каримге, Алим Кешоковха эм Давид Кугультиновха кезиулю ушакъны кезиуюнде  хар бирине да бирем тау тёппе саугъаларгъа айтхан эди. Бюгюнлюкде биринчи экисини атлары аталгъандыла. Жаланда Давид Никитични аты берилмей турады. Айтматовну аты Къыргъызстандагъы тау тёппелени бирине аталгъанды. Ол кемчилик кетерилсе, бек сюе эдим, - дегенди Абдул-Халим Мукаевич.