«Армрестлинг бла кюреширге эсимде да жокъ эди»

Битеу дуниягъа белгили армрестлингчи Отарланы Надира Кёнделенде туугъанды, анда ючюнчю номерли школну тауусханды. Школ заманында окъуудан сора бир башха затха сейири болмагъанды, битеу эсин анга бергенди. Мектепден сора Волгоградны архитектура-къурулуш къырал университетине киргенди, андан сора окъууун Москваны архитектура институтунда бардыргъанды. Жарау этип да Волгоградда окъугъанында башлагъанды. Ары дери къызны армрестлинг бла кюреширге аз да умуту болмагъанды, залгъа кеси да билмей тургъанлай тюшгенди. Биринчи курсда окъугъанында аланы тюрлю-тюрлю спорт секциялагъа айыргъандыла. Къолланы кючлерин силометр бла ёнчелегенлеринде Надираны эсеби 78 килограмм болгъанды. Андан сора жараулагъа жюрюп тебирегенди эм ол жылда окъуна областьда эришиуледе кюмюш майдалны алгъанды.

- Окъууну  бла жарауну бирге бардыргъан тынч тюйюлдю, алай сюйген адам онг табады, - дейди Надира. - Бир жарау 2,5 – 3 сагъатха дери созулады, залгъа тёрт кюнню жюрюрге тюшгенди. Эришиулени аллында уа ыйыкъда алты кюнню жарау этгенбиз. Мени алгъа Виктор Савич бла Запир Султанбегов, ызы бла уа Артур Агаджанян юйретгендиле, ЦСКА-гъа жюрюгенме.

Дунияны чемпионатына дери Надира Бухарестде Европаны биринчилигинде къытханды, анда 52 къыралдан 1500-ден аслам спортчу сынашхандыла. Битеу да тёрт тюбешиу бардырып, ол аланы барысында да хорлагъанды. Быллай даражалы турнирде кёнделенчи къыз биринчи кере болгъанды, аны ючюн бир кесек жарсыгъан да этгенди: «Мени бла сынашхан къызланы кёбюсюн ары дери кёрмегенме, аны ючюн хорлагъаныма бек къууаннганма. Жарауларым, кюрешгеним мени муратыма жетдиргендиле». Дунияны биринчилиги уа Болгарияны Благоевград шахарында къуралгъанды, анга 68 къыралдан эм кючлю спортчула къатышхандыла. Анда жыйырмажыллыкъ спортчу онг, сол къоллары бла аны бла эришгенлени барысын да хорлап, алтын майдалны алгъанды. Ызы бла дунияны Венгрияда Будапешт шахарда да болгъан кезиулю чемпионатында да битеу тюбешиулерин хорлам бла бошагъанды. Алай бла Надира ЮФО-ну, «Халкъланы шуёхлукълары» турнирни – экишер кере, дунияны тёрт кере чемпионуду. Башха-башха жыллада ол Волгоград областьны, Къабарты-Малкъарны, Москваны да эм иги спортчусуна саналып тургъанды.

Архитектура усталыкъны къалай сайлагъаныны юсюнден айта, Надира школда суратланы ариу ишлегенин, математиканы да айырып сюйгенин билдиреди: «Атам Отарланы Расул кеси да къурулушчуду, Къырымда «ССК»Газрегионда» механизированный колоннаны башчысыды. Ол мени да бу сферада ишлеригими сюйгенди. Анам а Атмырзаланы Аминни къызы Людмила сабий музыка школну элде филиалыны заведующийиди, фортепионада согъуудан устазды. Ол да аны жолу бла барырымы излегенди. Мен а къурулушха, искусствогъа да жууукъ специальностьну сайлагъанма – «Архитектурада реконструкцияла эм реставрация». Нек дегенде архитектура – ол къурулушда искусстводу».

 

Кульчаланы Зульфия.
Поделиться: