Документлени заказ бла алыргъа тынч амал

Адамланы жумушларын жалчытыуну игилендирир муратда, Россейни Пенсия фонду ахшы башламчылыкъ этгенди - аны регионну хар районунда управленияларында документлени заказ бла алыргъа боллукъду. Ол абадан адамлагъа, фондха барыргъа заманлары жетишмегенлеге, аналагъа бек хайырлыды, нек дегенде аны ючюн кезиуню сакъларгъа тюшмейди.

Керекли документлени заказ фондну жер-жерли управлениясына телефон бла сёлешип неда аны официал сайтында - www.pfrf.ru жазып этерге боллукъду, аны ючюн къырал жумушланы порталында эсепге тюшеригигиз изленирик тюйюлдю.

Сайтда «Электронные услуги» бёлюмде «Предварительный заказ документов» деген тизгинни сайларгъа, сора атыгъызны, тукъумугъузну, атагъызны атын, СНИЛС-ни номерин жазаргъа эм къайсы документ керек болгъанын белгилерге керекди. Битеу тизгинле толтурулгъанындан сора, анда документигиз къачан хазыр боллугъу билдирилликди. Алай бла адам белгиленнген заманда фондда барып, чурумсуз, къагъытын алаллыкъды.

 

 

Кульчаланы Зульфия.
Поделиться: