Сербиядан жангы терекчикле

Россельхознадзорну Шимал Кавказда регионла аралы Управлениясыны келечилери бу кюнледе Сербиядан Къабарты-Малкъаргъа келтирилген 32 минг алма терекчикге контроль халда кёз жетдиргендиле. Ведомствода айтханларына кёре, бу жол продукция Гюржюню жанындан, Шимал Осетияда Огъары Ларс деген чек пункт бла келгенди. Ол а санкцияла кийирилгени ючюн товарланы ташыу жолла тюрленнгени бла байламлыды, деп ангылатхандыла анда.

Алай бла терекчиклени къагъытлары, фитосанитария жаны бла халлери да тапдыла. Управленияда айтханларына кёре, быллай продукцияны ташыу бир да тохтамагъанды. Азмаз чурум чыкъгъанды ансы, предпринимательле келишимлерин толтурур амал, жангы жолла да табадыла. Эсге сала айтханда, былтыр бизни республикагъа тышындан юч миллиондан артыкъ терек келтирилгенди.

Урлукъну себип бошаргъа кёп къалмагъанды

Черек районда урлукъ быйыл 3140 гектарда себилликди. Ол санда 125 гектарда – зынтхы, 507 гектарда – нартюх, 50 гектарда уа жашил къудору себилгенди.  Андан сора да жаулу лён – 50, чёплеу – 267, картоф – 231, хобуста эм башха тахта кёгетле – 167, биржыллыкъ битимле – 74 гектарны аладыла. Саулай айтханда, ишни кёп къалмай экиден бири тамам  этилгенди дерчады.

Районну Эл мюлк управлениясыны специалистлери белгилегенлерича, кюн бузулмай турса, иш он кюнню ичинде бошаллыкъды.

Районну аграрийлери кюзлюклеге да тынгылы къарап чыкъгъандыла. Быллай будай, рапс, арпа битген 1650 гектар сабанлада семиртгичле жайгъандыла.