Санкцияланы болумунда экономикагъа тутхучлулукъ этиуню мадарлары сюзюлгендиле

«Россей Федерацияны Къырал Советини экономиканы соруулары эмда жангы коронавирус инфекцияны жайылыууна къажау сюелиу жаны бла ишчи къауумуну жыйылыуунда санкцияланы болумунда экономикагъа тутхучлулукъ этиуню мадарлары сюзюлгендиле», - деп билдиргенди  ол селектор кенгешге къатышхан Казбек Коков кесини телеграм-каналында.

Санкцияла бла къысыулукъ этиуге къажау ишлени юслеринден а РФ-ни экономиканы айнытыу министри Максим Решетников, РФ-ни цифралы айныу, связь эмда асламлы коммуникацияла жаны бла министри Максуд Шадаев билдиргендиле. Сергей Собянин а транспортда, къурулушда, энергетикада бла эл мюлкде системаны къурагъан предприятиялагъа льготалы кредитле бериуню программасын кенгертиу жаны бла этилген оноула бла шагъырейлендиргенди.

Ол билдиргенича, льготалы ипотеканы ставкасы 9 процентге дери азайтылгъанды, быйылны экинчи эм ючюнчю кварталларында страховой взносланы тёлеуню болжалы бир жылгъа созулгъанды.  Быллай мадар бизнесге шёндюгю болумгъа кесин жарашдырыргъа болушурукъду, деп айтылгъанды кенгешде.

Сёз дагъыда инвестиция проектле къалай толтурулгъанларыны, эл мюлк продукцияны экспорту не халда болгъаныны, россейли аэропортлагъа бла ИТ-сферагъа себеплик этиуню онгларыны юсюнден да баргъанды.

«Къабарты-Малкъарда экономикагъа тутхучлулукъ этиу жаны бла федерал  онорула толтуруладыла,-дегенди республиканы Башчысы, жыйылыуну эсеплерин чыгъара.- Саулай экономикада эмда системаны къурагъан регион предприятиялада бла бёлюмледе хал кюн сайын тинтиледи. Регионда экономика тутхучлулукъ сакъланады. Болумгъа кёре терк окъуна мадар этерик ведомстволу оператив штабла ишлеп турадыла».

                          

 

Юсюпланы Галина хазырлагъанды.
Поделиться: