Саулукъ сакълау министерствону коллегиясы болгъанды

КъМР-ни саулукъ сакълау министерствосуну коллегиясы болгъанды, анда 2021 жылны кёрюмдюлерине къарагъандыла эм юсюбюздеги жылны борчлары белгиленнгендиле. Къабарты-Малкъарны Башчысы Казбек Коков коллегияны ишине кеси къатышханды.

КъМР-ни саулукъ сакълау министри Рустам Калибатов белгилегеннге кёре, 2021 жыл, аны аллындагъы 2020 жылда болгъаныча, коронавирус ауруугъа къажау бла байламлы ётгенди.

Жыйылыуну кезиуюнде коронавирус инфекциядан ауругъанлагъа къаллай медицина болушлукъ берилгенини юсюнден соруула сюзюлгендиле.   Саулукъ сакълау учрежденияла ауругъанладан толу болуп ишлегендиле.  Саулай да тогъуз госпиталь къуралгъан эди, алада 1859 ундурукъ болгъанды, ол санда 1408 кислород бла жалчытылыннганла. Пандемияны кезиуюнде жангы штамм жайылгъанда кислород бек керекли болгъанды. Госпитальланы къошакъ халда кислород бла жалчытыргъа РФ-ни Правительствосу федерал бюджетден 147 миллион сом бёлгенди.

Республикада ОРВИ  инфекциягъа къажау жети диагностика амбулатория ара эм тогъуз компьютер томография этген аппарат  ишлегенди. Саусузла  кече-кюн да тийишли болушлукъну алгъанлай тургъандыла, ОМС-ни хайырындан 60 мингнге жууукъ тинтиу этилгенди.    Терк эм мычымай медицина болушлукъ берген 42 автомобиль мажарылгъанды, аны хайырындан саусузлагъа заманында жетерге онг чыкъгъанды.   Коронавирус бла ауруп амбулатория амал бла медицина болушлукъ алгъанлагъа дарманла алыннгандыла. 

Медицина болушлукъну качествосун игилендирирге эм вирусдан ауругъанла бла байламлыкъны жюрютюрге  бирикген контакт-ара  ачылгъан эди, аны хайырындан 23 минг билдириуге къаралгъанды,  аллай контакт-арала  19 амбулатория бёлюмлени мурдоралында ишлеп тургъандыла. Женгил халда ауругъанла телефон бла консультацияла алып кеслери алларына медицина болушлукъну алгъанларыны хайырындан,  абулаторияда ишлегенленлеге аурлукъ аллай бир жетмегенди.   Он эки лаборатория биригиуде  белгиленнген кезиуде 600 минг ПЦР-тинтиу бардырылгъанды. Пандемияны къайнагъан кезиуюнде, абулаториялада эм кюндюз жатхан жерледе бир ызгъа 9 минг адамгъа болушлукъ этилип тургъанды.  

Госпитальлада ишлегенлеге  федерал тёлеуледен сора да, КъМР-ни Башчысыны указына тийишлиликде регион тёлеуле да берилгендиле. 2021 жылда госпитальлада ишлегенледен  эки минг адамгъа 470 миллион сом тёленнгенди.

«Эки жылны ичинде республиканы саулукъ сакълау системасы эпидемиология болумну тюзетиу бла тийишлисича ишлейди. Россейни Президенти, Правительствосу, Къабарты-Малкъарны оноучулары этген оноула, бизге заманында тийишлисича медицина болушлукъ этерге онг  береди.  Регионда медицина болушлукъ бирилмей бир адам да къалмагъанды», - деп чертгенди министр.

 Къабарты-Малкъарда «Саулукъ сакълау», «Демография»  эм  саулукъ сакълауну биринчи звеносун айнытыу регион  программа ишлейди. «Саулукъ сакълау» миллет проектни республикада бардырыргъа 2021 жылда федерал бюджетден  500 миллион сом бёлюннгенди. «Онкология ауруулагъа къажау» регион проектни чеклеринде онкология диспансерде жеринде тепдирилген рентген аппарат орнатылгъанды, урология эм гинекология жаны бла операцияланы этгенде рентген компьютер томографияны хайыраланадыла. Андан сора да 2021-2025 жыллада федерал инвестиция программагъа кёре, бир ызгъа 250 адамгъа медицина болушлукъ берича Республикалы онкология диспансер ишленирикди. Ол жумушлагъа 3 миллиард сомдан аслам бёлюнюрюкдю. Къурулуш ишле быйыл башланырыкъдыла.

 Озгъан жылда «Земский доктор»  программагъа тийишлиликде он тогъуз врачха бла алты медсестрагъа иш берилгенди. Быйыл 22 врачха бла 6 медсестрагъа  иш табыллыкъды.  Бек керекли специалистлени окъутуу да барады. Бюгюнлюкде ординатурада окъууларын бошап, 34 медицина учрежденияда адам иш тапхады.  

Къабарты-Малкъарда  бийик технологиялы медицина болушлукъ бериу айный барады. Шёндю аллай амалны 9 къырал эм 3 иели медицина биригиу береди. Саулай да республикада бийик технологиялы болушлукъну 13 тюрлюсю этиледи. Озгъан жылда 2020 жыл бла тенглешдиргенде льготалы халда дарманла бла жалчытыу 16 процентге ёсгенди.

 Эсигизге салайыкъ, озгъан жылны аягъында КъМР-ни Башчысы Казбек Коковну буюруу бла республиканы 2020 жылны бюджетине къошакъ халда 600 миллион сом салыннган эди, ол санда онкология ауруулары болгъанлагъа дарманла сатып алыргъа. 

«КъМР-де саулукъ сакълауну биринчи звеносун жангыртыу» программагъа кёре, республикада 50 медицина учреждения жангыртылгъанды, тынгылы ремонт этилгенди эм жангысы ишленнгенди. Ол программа бла медицина учреждениялагъа 140 обрудование сатылып аллынганды, ол санда эки рентген комплекс, юч ультразвук аппарат эм аллай бир эндоскопия комплекс.

Жыйылыуну кезиуюнде Казбек Коков республиканы саулукъ сакълау системасын айнытыу эм медицина учрежденияланы  ырысхы-техника жаны бла жалчытыу Россейни Президенти Владимир Путинни социал политикасыны, -миллет проектлени къурап,  жашауда бардырылгъанларыны хайырындан болгъанды.

 «Жашауда бардырылгъан проектле - онкология диспансер, жангы поликлиника, участкалы больница эм башха объектле федерал даражада РФ-ни Правительствосуну Председателинде эм Саулукъ сакълау министерствода къабыл этилгендиле, биз алагъа ыразылыгъыбызны билдиребиз».

«Озгъан эки жыл бизни барыбызгъа да къыйын болгъанды. Кючюбюзню асламысын  жангы коронавирус аурууну къурутургъа буруп тургъанбыз, ол битеу дуниягъа да къайгъы салгъанды. Саулукъ сакълауда биз профилактика ишге аслам эс бёлюрге керекбиз. Болум къалай болгъанына да къарамай, биз адамланы арасында халланы унутмазгъа керекбиз. Саузузгъа жапсарыу сёз айтыу, аны къайгъысына тийишлисича эс бёлюу, ишде магъаналы жерни алыргъа керекди». 

Коллегияны ишине Правительствону Председатели Мусукланы Алий,  аны орунбасары Марат Хубиев, КъМР-де Роспотребнадзорну управлениясыны оноучусу   Жирослан Пагов,  медицина учрежденияланы таматалары къатышхандыла.

 Бизни корр.

 

Поделиться: