Совет халкъны жигитлигине аталып

«Чекчилени жаш нёгерлерини» отрядларыны республикалы эришиулерине 12 команда, битеу да бирге школланы жюзден аслам окъуучусу, къатышхандыла. Слётну ала совет халкъны Уллу Ата журт урушда Хорламыны 77-жыллыгъына атагъандыла.

Конкурсну РФ-ни ФСБ-сыны КъМР-де Чекчи управлениясы къурагъанды, бардырылгъан да ведомствону бёлюмлеринден биринде этгенди. Аны ачылыууна службаны ветеранлары къатышхандыла. «Боевое братство» жамауат организацияны регион бёлюмюню башчысы Гелястанланы Барасбий, жашланы бла къызланы алгъышлай, ачыкъ эришиуледе жетишимли болурларын тежегенди.

Эришиуле уа Россейни байрагъын кётюрюуден башланнгандыла. Бу сыйлы ишни Тырныауузну 6-чы школуну окъуучусу Къумукъланы Дианагъа ышаннгандыла. Ол «Чекчилени жаш нёгерлерини» къымылдаууна, патриот акциялагъа тири къатышханы ючюн тийишли болгъанды анга.

Ол кюн жашла бла къызла чабып, гранат атып, автоматны чачып эм жыйып, керохдан илишаннга атдырып, радиациягъа эм уулу сауутлагъа къажау кийимле кийип эришгендиле. Дагъыда ала чекчи службаны тарыхын къалай билгенлерин да кёргюзтгендиле.

Эришиулени аллында уа, Чекчи управленияны келечиси Алексей Мирошниченко республиканы битеу районларында да «Чекчилени жаш нёгерлерини» 13 къаууму къуралгъанларын билдиргенди. «Быллай жумушла жаш адамланы Ата журтубузгъа кертичи болургъа юйретедиле, аны бла бирге уа чекчилени тарыхын билдиредиле. Ахыр кезиуде   Уллу Ата журт урушну, Россейни тарыхыны юслеринден ётюрюк хапарла асыры кенг жайылгъандыла. Быллай жыйылыулада ала къыралыбызны тарыхы бла шагъырей боладыла, ата-бабаларыбызны жигитликлери бла ёхтемленирге юйренедиле. Алгъан билимлери алагъа къыралыбызгъа айтылгъан ётюрюклеге къажау турургъа болушадыла», – дегенди ол.

Республикалы слёт а быйыл 12-чи кере къуралгъанды. Пандемия бла байламлы ахыр эки жылда эришиуле бардырылмай къалгъандыла.

Сёзге, Огъары Малкъарны Абайланы Мисостну атын жюрютген 2-чи номерли орта школунда отряд республикада биринчи болуп къуралгъанды – 2006 жылда. Бу эришиулеге уа школчуланы Чаналаны Роза бла Гадийланы Асият алып келгендиле. «Андан бери озгъан жыллада биз чекчиле бла байламлыкъланы юзмей, бютюнда кючлегенбиз.  Отрядны ишине тири къатышып, ызы бла уа чекчини усталыгъын сайлагъан, бюгюнлюкде ведомствода къуллукъ этген жашларыбыз да бардыла», – дегенди бизге Чаналаны Роза.  

Огъары Малкъарны школундан а 7 жаш адам келгендиле. Сёзге, Кучукланы Ислам 11-чи классда окъуйду, отрядха къатышханлы уа юч жыл озгъанды. Ол да школдан сора аскерчи усталыкъгъа юйренирге сюйгенин айтханды бизге. «Мен Ата журтубузну – Россейни – къоруулауну сыйлы ишледен бирине санайма», – дегенди эмда битеу кючюн, билимин кёргюзтюп, нёгерлери бла бирге алчы боллукъларына ишексизлигин айтханды бизге.

Кертиси бла да ол кюн Огъары Малкъарны жаш чекчилери битеу эришиуледе да айырмалыла болуп, хорламгъа жетишгендиле. Экинчи жерге уа Прохладный шахарны 4-чю номерли школуну окъуучулары чыкъгъандыла. Бабугентни Деппуланы Хакимни атын жюрютген кадет школуну окъуучулары уа ючюнчюле болгъандыла.

Эришиуледен сора жаш адамлагъа аскер техниканы бла сауутланы кёрмючю къуралгъанды. Ахырында аланы аскерчи как бла сыйлагъандыла.

Кюз артында уа чекчиле Элбрус районда «Зарница» аскер эришиулени бардырыргъа белгилейдиле.

Тикаланы Фатима.
Поделиться: