Баш магъаналы жумушла экономиканы, промышленностьну, эл мюлкню эм башха ызланы айнытыу

РФ-ни Правительствосуну Председатели Михаил Мишустин 2030 жылгъа дери Шимал-Кавказ федерал округну социал-экономика айныууну стратегиясын къабыл кёрюуню юсюнден буйрукъгъа къол салгъанды. Баш магъаналы жумушланы араларында – турист инфраструктураны жангыртыу, уллу промышленный инвестпроектлени бардырыу, школланы, сабий садланы эм автомагистральланы къурулушлары, биринчи медицина-санитар болушлукъ тапдырыу, сабийлени саулукъларын сакълау, бийик технологиялы медицина амалланы игилендириу, жашау журтла бла байламлы сорууланы тамамлау барды.

Транспорт инфраструктураны айнытыуну чеклеринде «Нальчик» аэропортну жангыртыу жаны бла ишле тындырыллыкъдыла. «Эльбрус» курорт Россейде тау-лыжа туризмни айнытыуну араларындан бири боллукъду. Улоула жюрюген жангы жолну къурулушу белгиленеди, ол шимал-кавказ курортланы, ол санда Къабарты-Малкъарны курортларын, къара тенгиз турист арала бла байларыкъды.

СКФО-ну промышленный бёлюмюн айнытыуда баш ызладан бири Тырныаууз тийресинде чыгъарылгъан вольфрам-молибденни къазыуну эм аны жарашдырыуну жангыдан башлау боллукъду.

Экономиканы ёсдюрюуню магъаналы кесеги агропромышленный комплексди. Бахчачылыкъны, къойчулукъну, малчылыкъны, чабакъчылыкъны жангы даражагъа чыгъарыр умут барды. Эл мюлкчюлеге предприятияланы айнытыуну бирлешдирилген хазыр юлгюлери бла жыйымдыкъла берилирча онг боллукъду, ары агротехнологияла, консультация халлы ашырыула эм къырал себепликле киредиле. Къабарты-Малкъарда арт жыллада жемиш-жилек, консерва промышленностьну, урлукъ жюрютюу бёлюмлени, дагъыда малчылыкъны энчи ызларын тири айнытырча мурдор къуралгъанды.

Жангы стратегия тышындан санкцияла басынчакълыкъ этген болумланы кезиуюнде экономика халланы эсге алып къуралгъанын белгилейдиле РФ-ни Правительствосунда.

Регионну эм округну айнытыу юлгюлерин къурауну чегинде КъМР-ни Башчысы Казбек Коков Къабарты-Малкъарны экономикасын ёсдюрюу жаны бла туура этген предложенияла да жерлерин тапхандыла стратегияда. Документде белгиленнген республикалы магъаналы ызла эм объектле, республиканы оноучуларыны РФ-ни Правительствосу, профильли федерал министерствола, РФ-ни Президентини СКФО-да толу эркинликли келечисини аппараты бла ишлеуюню эсеплерине кёре, Шимал-Кавказ федерал округну айнытыу стратегиясына къошулгъандыла.