Токну урлаучуланы тохтар умутлары жокъду

Электрокюч бла жалчытыучу «Каббалкэнерго» компания токну урлаугъа къажау рейдлени дайым бардыргъанлай турады. Специалистле сетьлеге эркинликсиз къошулгъанланы ачыкълайдыла, эсеплеучю приборланы да тинтедиле. Бирде бу ишге жер-жерли администрацияланы, право низамны сакълаучу органланы келечилери да къатышыучудула, деп билдиредиле компанияны пресс-службасындан.

Алай бла быйыл биринчи кварталда токну эркинликсиз хайырланнган 34 шарт тохташдырылгъанды. Битеу да 6,2 миллион киловатт-сагъат урланнганды, аны багъасы 21,1 миллион сом болады. Бу ахчагъа жыйырма километр ток ызла ишлерге боллукъ эди.

Айтылгъаныча, быллай шартланы ачыкълауда баш жерни рейдле аладыла. Алай инсанла билдиргеннге да компания эс бурмай къоймайды. Сёз ючюн, алгъаракъда Нальчикде сатыу-алыу арада счётчикге адамны къолу жетген болур деген хапар чыкъгъанды. Энергетикле ол приборну тешип, лабораториягъа жибергендиле. Анда уа аны ичинде аберилери тюрлендирилгенин тохташдыргъандыла. Тергеулеге кёре алай этилгенини хайырындан аманлыкъчыла 2,4 миллион киловатт-сагъат электрокюч урлагъандыла.

Саулай айтханда, битеу ачыкъланнган шартланы юсю бла актла жазылгъандыла, право низамны сакълаучу органлагъа да заявленияла берилгендиле. Бузукълукъ этгенле тазир тёлерикдиле, урлагъан электрокючню багъасын да жабарыкъдыла. Аны уа энергетикле счётчиксиз не къадар кёп къоратыргъа амал бар эсе да, ол къадар кёп тергеп жазарыкъдыла. Бирле уа административ неда уголовный жууапха окъуна тартылыргъа боллукъдула.

«Компаниягъа уручулукъ заран келтиргени бла къалмай, хайырланыучулагъа да къоркъуу салады. Сетьлеге эркинликсиз къошулгъанланы хатасындан токну кючю мардасындан артыкъ кётюрюлюрге неда азайыргъа боллукъду, ол а аны бла ишлеген приборланы бузарыкъды. Дагъыда ызлагъа къошулама дегенни ток урургъа боллукъду», - дегенди аны башчысы Муртаз Каров.

Быллай шартланы юсюнден 8-800-220-0-220 номерге сёлешип билдирирге боллукъсуз.