Озгъан жылда Жамауат палата къалай ишлегенин сюзгендиле

КъМР-ни Башчысы Казбек Коков Къабарты-Малкъарны Жамауат палатасыны таматасы Хазратали Бердов бла ишчи тюбешиу бардыргъанды. Х. Бердов республиканы оноучусуна жыл сайын этилген докладын кёргюзтгенди, деп билдиргендиле республиканы оноучусуну пресс-службасындан.

 Озгъан жылда пандемияны бла коронавирус инфекцияны жайылгъанына да къарамай  КъМР-ни Жамауат палатасы ишин тохташдырылгъан мардалагъа кёре бардыргъанды. Россей Федерацияны Къырал Думасына бла муниципал органлагъа депутатланы сайлагъанда, алагъа къарау бийик къуралыулу халда ётгендиле.

КъМР-ни Жамауат палатасы республикада магъаналы сорууланы сюзген къыйматлы майдан болгъанды. Къабарты-Малкъарны жамауаты пленар жыйылыулада, «тёгерек столлада», видеоконференцияланы бардыргъанда республикада жашагъанлагъа деп магъаналы сорууланы сюзгендиле, ол санда  экономиканы тюрлю-тюрлю бёлюмлеринде миллет проектлени тамамлау, халкъны къайгъы этдирген соруулагъа къарагъанда толтуруучу власть органланы келечилери да чакъырылгъандыла.  

1941-1945 жыллада болгъан Уллу Ата журт урушну тарых магъанасын къоруулаугъа,  миллетлени араларында бирликни сакълаугъа эм Къабарты-Малкъарны маданият хазнасыны магъанасына жораланнган соруула кётюрюлгендиле.

Жаш тёлю политикагъа, сабий садлада эм школлада  билим бериуге, республиканы экономикасыны излемлерине кёре орта профессионал билим берген учрежденияланы инфраструктураларын айнытыугъа уллу эс бурулгъанды. Артыкъда качестволу медицина болушлукъ бериуге  энчи магъана берилгенди. Коронавирус инфекция жайылгъанда республикада саулукъ сакълау учрежденияла тийишлисича ишлегенлери белгиленнгенди, ол санда жюрек эм тамыр ауруулары болгъанлагъа къарау эм элледе саулукъ сакълау системаны айнытыу тийишлисича бардырылгъанын.

  Жамауат палатаны тюрлю-тюрлю комиссиялары республиканы социал-экономика айнытыууна себеплик этерик алтмышдан аслам магъаналы бёлюмлеге эс бургъандыла,  сюзюлюулени кёрюмдюлерине кёре толтуруучу власть органлагъа рекомендацияла жиберилгендиле.

Социальный бёлюмледе жашау журт-коммунал мюлкде, тапландырыуда эм башха жерледе жамауат мониторинг бардырылгъанды. Жетмиш алты норматив праволу актха къаралгъанды, 22 федерал законну проектине    экспертиза берилгенди.  Жамауат палатаны ишинде магъаналы бёлюмлеринден бирине, инсанла ийген, ол санда кеслерини жарсыуларын билдирип эм жамауат бла байламлы соруулагъа къарау саналады. 2021 жылда КъМР-ни Жамауат палатасыны таматасына 15 къагъыт келгенди, ала тинтилгенлеринден сора тийишли ведомствала  бла  кётюрюлген сорууланы тамамлаугъа себеплик этилгенди.   

Казбек Коков  КъМР-ни Жамауат палатасыны битеу къауумуна социал магъанасы болгъан ишни бардыргъанлары ючюн ыразылыгъын билдиргенди. Республиканы оноучусу жаш тёлюню патриот жаны бла юйретиуде Жамауат палатаны уллу магъанасы болгъанын, ол ишни бардырыугъа жаш тёлю тири къатышыргъа эм миллет проектлени тамамлагъанда  жамауат контроль этерге кереклисин чертгенди.

Келир кезиуде магъаналы борчла да белгиленнгендиле, ол санда коммерция иш бла кюрешмеген биригиуле бла эм муниципал администрациялада жамауат советле бла  байламлыкъны кючлеуге эм жамауат контрольну тирилтирге борч салыннганды.  

Бизни корр.
Поделиться: