Юйде билирге керекли затла

-Мен юйню тизгинин жыйгъанлы  алай кёп болмайды, олсагъатха болгъанны букъу басханды,-деп тарыгъадыла тиширыула.

 Керти  айтадыла. Лак бла боялгъан шкаф, шинтик, телевизор болсун, мукъуладис темирни тартханча, кеслерине  букъуну бек тартадыла. Аны себепли аланы эрттен сайын жумушакъ мылы быстыр бла сыйпай турургъа керекди. Бек игиси уа «уют» деген энчи салфеткала бла ышысады.  Ол букъуну терк кетереди, мебельде жукъа глянец ызла къояды, тырнамайды. Алай бла букъуну терк жабышыуундан сакълайды. Сыйпап бошагъандан сора да салфетканы быстыр жуугъан порошок бла жуууп, аны  экинчи кере да хайырланыргъа боллукъду. Аны жуугъан этгенликге бузулмайды.

 Мебельни лак бла сюртюлген башха юй  кереклени тыш тюрсюнлерин бузмай сакълар ючюн «Полироль»,  «Лучистый-1», «Комфорт», «Антик» деген эм башха тюрлю аэрозольла чыгъарыладыла. Аланы хайырлансагъыз, мебелигиз эм башха  тюрлю юй кереклеригиз алгъыннгы тюрсюнлерин тас  этмейдиле.

 Жумушакъ мебельни тазалагъанда кёбюсюнде, кюйюзню тазалагъанча, пылесосну хайырланыргъа да боллукъду. Кюйюзню тышына чыгъарып, хауада къакъса, бек игиси олду. Эсигизде болсун, аны балконда къагъаргъа жарамайды. Алай  этсегиз, андан чыкъгъан букъу къоншу фатарлага кирирге боллукъду. Жумушакъ мебельни, кюйюзлени къагъаргъа деп энчи, жумушакъ  пластмасса  къакъгъычла чыгъарыладыла. Аллай къакъгъыч болмаса, сыйдам, артыкъ базыкъ болмагъан таякъ бла къагъаргъа да жарайды. Ол заманда аланы букъулары башха олтоулагъа эшик , терезеле, форточка бла кирмез ючюн аланы гам жабаргъа унутмагъыз. Болсада отоудагъы диванны, жумушакъ шинтикни юслерин эски мылы быстыр бла жабаргъа керекди.

Кюйюзлени кир-кипчиклерин а къышда тышына чыгъарып къар бла тазаларгъа да жарайды.

                                                            

                                                                         хазырлагъанды.

Басмагъа Холаланы Марзият
Поделиться: