Жигит генералны хурметине-тёрели турнир

Бу кюнледе Нальчик шахарны Универсал спорт комплексинде Абхазия Республиканы жигити, Совет Союзну сыйлы лётчиги, генерал-лейтенант Султан Асламбекович Сосналиевни хурметине  эркин тутушуудан  тюбешиу ётгенди. Ары Къабарты-Малкъарны бла  Абхазия республиканы жыйымдыкъ командалары къатышхандыла.

 Бу турнир экинчи кере бардырылады. Аны генералны юй бийчеси Любовь Сосналиева,  Абхазияны доброволецлерини  союзу эм КъМР-ни республиканы Спорт министерствосу къурагъандыла.

Турнирни ачылыууна КъМР-ни эм Абхазияны законла  чыгъарыучу эм толтуруучу власть органланы келечилери,  къырал  къуллукъчула эм айтхылы спортчула къатышхандыла. Ала жаш спортчулагъа таза хорламланы, судьялагъа уа  тюз багъа бичиуню  тежегендиле.

КъМР-ни спорт министрини орунбасары Заур Хежев, келгенлени ведомствону атындан алгъышлай, бу тюбешиу магъаналы  болгъанын чертгенди. «Инсан адамланы эслеринде къалгъаны къадар ол  сауду. Бюгюннгю тюбешиу аны ачыкъ кёргюзтеди», - дегенди ол.

 Абхазияны жигити Фазлибей Авидзба  уа республиканы башчысы  Аслан Бжанияны алгъышлау сёзюн окъугъанды. Къабарты-Малкъарны доброволецлерини жигитликлерини юсюнден  да айтханды эмда ол къазауатда  Султан Сосналиевни  энчи къыйыны болгъанын чертгенди.

Сыйлы къонакъланы санында Абхазияны спорт тутушуу  жаны бла федерациясыны президенти, дунияны, Европаны эм Россейни кёп кере чемпиону, 2012 жылда Олимпиаданы доммакъ призёру Денис Царгуш да болгъанды.

Эришиулени эсеплерине кёре биринчи жерни КъМР-ни жыйымдыкъ къаууму алгъанды. Экинчи жер Нальчик шахарны гёжефлериндеди. «Доммакъгъа» уа Абхазия республиканы спортчулары тийишли болгъандыла.

Султан Асламбековични юй бийчеси Любовь Сосналиева да  багъалы саугъала  хазырлагъанды.  Аны саугъа  фонду 150 000 минг сом болгъанды. Биринчи жер ючюн  - 70 минг, экинчи  ючюн – 50, ючюнчю ючюн да – 30 минг сом берилгенди.

 

Додуланы Мадина.
Поделиться: