Шахарны ичин зоналагъа бёлгендиле

  Ковид бла байламлы Пекинде хал аламат болмагъанын эсге ала, Оюнланы къурагъанла спортчулагъа бла къонакълагъа энчи онгла къурагъандыла. Алай бла эришиулеге къатышханла, аланы бардыргъанла барысы да белгиленнген юч зонадан тышына чыгъарыкъ тюйюлдюле. Аллай онг хар жумуш да бошалгъандан сора жаланда 21 февральда берилликди. Ары дери 17 кюнню ичинде ала жашагъан, ашагъан да анда этерикдиле.

  Бюгюнлюкде Къытайгъа 11 минг тыш къыраллы келгенди. Биринчи зона Пекинни арасындады. Анда бузда учуу бла байламлы эришиуле ётерикдиле. Экинчиси Яньцин деген жердеди. Анда тау лыжалада бла сноубордда эриширикдиле. Ючюнчюсю уа Пекинден 200 километрде орналгъан Чжанцзякоу шахардады. Биатлондан, фристайлдан эм сноуборддан кючлерин бла усталыкъларын атлетле анда кёргюзтюрюкдюле.

  Ол зоналаны хар биринде да стадионла, спорт майданла, конференц-залла да бардыла. Дагъыда аланы араларын энчи темир жолла байлайдыла. Белгиленнген поезледен башхалагъа ол ызла бла жюрюрге жарарыкъ тюйюлдю Оюнла бошалгъынчы. Тазир салынырыкъды. Аллай транспорт авариягъа тюшсе окъуна, анга болушургъа эркин этиллик тюйюлдю… Аны юсюнден энчи оноу барды.

 Тыш къыраллыла бла байламлы жорукъла да бек кючлюдюле. Пекиннге келликлени саулукълары бла байламлы жумушла эки ыйыкъ алгъа башланнгандыла. Аланы кезиуюнде бир ненча тест этип, аланы кёрюмдюлери бла самолётха олтурургъа эркинлик алай бериледи. Сора  Къытайгъа келгенлей да, ала энчи белгиленнген къабакъладан ётюп, жангы тест бередиле. Халы тапны къонакъ юйге ашырадыла. Аурууу болгъан ачыкъланса уа,  аны не карантиннге неда больницагъа ашырадыла. Изоляторда аланы кюннге 3 кере ашатадыла эм WI-FI бла жалчытадыла. Сора хали 3 кюнню ичинде тап болгъан адам артха, зонагъа къайтыргъа эркинди.

Ауругъан адам бла байламлыкъда болгъан тыш къыраллы 24 сагъатны ичинде къыралдан кетерге борчлуду. Алай команда ансыз болаллыкъ тюйюл эсе, ол башхала бла контактха кирирге эркин тюйюлдю. Тренировкаларын да кеси отоуунда ётдюрюрге, хазырланыргъа да стадионнга кеси жангыз жюрюрге керекди. Аны бла бирге кюн сайын тест да берип турлукъду. Спортчу  эсе уа, тестни эришиуге дери 6 сагъат алгъа берирге борчлуду.

Эришиулерин бошагъан спортчуланы уа самолёт бла юйлерине ашырып турлукъдула. Ол рейслеге башха жерледе къонаргъа эркин этиллик тюйюлдю.

   Оюнлагъа къараргъа сюйгенлени саны уа 150 минг адамгъа жетеди.