Онкологиядан аурууланы багъыуда чырмаула болмазгъа керекдиле

2020 жылда Россейде онкология ауруу 556 минг адамда ачыкъланнганды, аладан 3751 акъылбалыкъ болмагъанладыла. Бюгюнлюкде 29 минг сабий, ол а онкологиядан къыйналгъанланы 0,7 процентиди, медицина эсепде турадыла.

Быллай тарихле  РФ-ни Къырал Думасыны саулукъну сакълау жаны бла комитетини бу кюнледе бардырылгъан жыйылыуунда белгили этилгендиле. 

Думаны башчысыны орунбасары Анна Кузнецова пандемияны аллындан бери онкологиядан ауругъан сабийлени багъыуда чырмаула болгъанларына эс бургъанды. «Эпидемиология болум бла байламлы бир-бир регионлада саусузланы больницагъа заманында жатдырмай тебирегендиле. Алай шёндюча къыйын заманда быллай ишлени болдурмазгъа борчлубуз. Онкологиядан аурууланы багъыуда чырмаула болмазгъа керекдиле»,- дегенди ол.

Болсада, жер-жерледен быллай жарсыулу болумланы юслеринден билдириуле келгенлери бла байламлы Анна Кузнецова халны депутат контрольгъа алыргъа чакъыргъанды.

 Россейли фармакология компанияла адамны жашаууна артыкъда магъаналы дарманланы  жетер тенгли чыгъармагъанлары энтта бир жарсыулу болумду. Аны бла байламлы саусузлагъа врачла жазгъан дарманланы орунларына алагъа ушаш препаратла (дженерик) бериледиле, ол а ата-аналаны, медиклени да жарсытады.

-Сабийни федерал клиникагъа медицина тинтиулеге жиберген кезиуде врач аны багъыуда артыкъда хайырлы дарманны жазаргъа боллукъду. Алай бирде регионлада аллай препаратла жокъдула, аланы сатып алыр ючюн а бек  аздан ай озады,- дегенди Анна Кузнецова дарманланы сатып алыуну  болжалларыны юсюнден айта.

Жыйылыуда ачыкъ этилген кемчиликлени кетериу жаны бла предложенияла къабыл кёрюлгендиле. Ол санда россейли фармацевтиканы жалынчакъсызлыгъын жалчытыр ючюн субсидияла бёлюнюрге кереклисине эс бурулгъанды. Бу жаны бла  жумушла «Единая Россия» партияны Халкъ программасына кийирилгендиле.

 Анна Кузнецова льготалы дарманланы сатып алыуну низамын тюрлендирирге, дженерикле адамны саулугъуна салыргъа боллукъ заранны ангылатыргъа,  аллай кезиулени эсепге алып, Роспотребнадзоргъа билдириуню мадарларын игилендирирге кереклисини юслеринден да айтханды.