Жукъусузлукъ -гипертонияны, язваны эм талай башха аурууланы сылтауларындан бири

  Саулукъ сакълауну битеудуния организациясы адамны саулугъун белгилеген шартланы санында татлы жукъуну аурумагъан жюрек, женгил солуу, кючлю иммунитет бла тенг салгъанды, деп эсгертедиле «Аргументы и факты» газетде. «Аны юсюнден Гиппократ да билгенди. Ол адам жукълагъандан сора санларында женгиллик сезе эсе, аурууу ажалсыз болгъанына ийнаннганды», - дейди Сомнологланы россейли обществоларыны президенти, «Барвиха» клиника санаторийни жукъу жаны бла медицина арасыны башчысы, медицина илмуланы доктору, профессор Роман Бузунов.

  Адам ишлеген заманында иги жукълаялмагъанлыкъгъа, солуу кюнледе уа жукъудан тойса, жетмеймиди, дейдиле адамла. Алай , доктор айтханыча, иш анда тюйюлдю, бир ненча кюннге алгъадан жукълап къалыргъа онг жокъду. Кёп керекли гормонла жангыз да кечени энчи бир кезиуюнде чыгъарыладыла. Абаданлада уа, ол санда, чархны ауурлугъун эсепде тутханла да. Алай бла дайым тынгылы жукъламагъан терк окъуна семирип башларгъа боллукъду. Эр кишиле да сакъ болургъа керекдиле – тестостерон гормон да кече къуралады.

  Андан сора да, кече жукълаугъа артыкъ берилмегенле гипертониядан, язва эм талай башха аурууладан асламыракъ къыйналыргъа боладыла. Аны орунуна уа солуу кюнледе тюшге дери тёшекден къопмай турсагъыз, чархыгъыз юйреннген низамны бир ненча сагъатха бузасыз. Ол а артда битеу физиология процесслени барыуларына чурум салады. Аны ючюн ары дери къуралгъан болжалдан бир-эки сагъатдан кёп турмазгъа кюреширге керекди.

  Адам кереклисича бир жукълагъанын ды тынч ангылаяллыкъды. Ол уяннгандан сора онбеш минут ётгенлей жукъусурамай къобуп, жумушланы этип айлана эсе, кюндюз да жукъусу келмегенлей (жангыз да 15:00 – 17:00 сагъатда арып, солургъа сюйген заманын санамагъанлай), сора кече жатхандан сора онбеш минутдан жукъугъа батылса, хар не да тапды.

  Жукъларгъа чырмауну шёндюгюлю гаджетле да этедиле. Аланы бизни мыйыбыз кюнню жарыгъыча ангылайды. Алай эсе уа, мелатонин (жукълатыучу гормон) аз чыгъарылады, адам да жукълаялмай кёп турады.

  Адам уллая баргъаны бла къыйналып жукълайды. Андан асламысында  жукъларгъа къаллай бир сюйселе да, аллай бир заманлары болгъанла къыйналадыла. Аны дарманы бошду – жукъларгъа берилген заманны къысхартыргъа керекди. Жукъусузлукъгъа дагъыда абаданлада аслам тюбеучю неврология ауурула да келтиредиле – кече аякълары-къоллары кеслери аллына титиреп-къалтырап турсала. Хурулдау, солуу тохтап къалыу (апноэ) да хаталыды. Алай бу затладан къыйналгъанлагъа жукълатыучу дарманланы ичерге жарамайды – адам уянмагъанлай ёлюрге боллукъду.

  Ата-анала тюз бусагъатда жукълагъан сабийни къулакъчыгъына ол эм акъыллыды, эм жетишимлиди, эм саулукълуду деп шыбырдай турсанг, ол кертиси бла да аллай боллугъуна ийнанадыла. Сомнолог юйретгеннге кёре, биз информацияны 80 процентин подсознанияны хайырындан алабыз. Анга кёре уа, уяна неда къалкъый тургъан кезиуле адам гипнозгъа бегирек тюшген заманнга саналадыла. Ол сагъатлада аны бир затха ийнандырыргъа тынчды – инсан айтылгъанны тинтмегенлей, магъанасына тюшюнюп къалады. Юлгюге, экстрасенсле да быллай такъыйкъаланы сюйюучюдюле. Алай бла сабийге быллай кезиуледе ол иги, огъурлу, сейир инсан болгъанына, терк сау боллугъуна ийнандырыргъа жарарыкъды.