Аш-азыкъны кёп тюрлюлерин чыгъарыу ёсгенди

Къабарты-Малкъарда аш-азыкъ эмда жарашдырыучу предприятияла былтыр январьдан  ноябрь айны ахырына дери алыучулагъа 19 миллиард сом багъасы продукция жибергендиле. Шимал-Кавказстатдан билдиргенлерине кёре, буруннгу жылны ол кезиуюбла тенглешдиргенде, ол он процентге кёпдю, дегендиле КъМР-ни Эл мюлк министерствосунда.

Къайсы продукциядан къаллай бир чыгъарылгъаныны юсюнден айтханда, сютден – 23, андан жарашдырылгъан ашарыкъладан – 8,3 процентге аслам алыннганын  белгилерчады. Дагъыда сары эмда чёплеу жаудан эки минг тоннадан артыкъ  чыгъарылгъанды, 2020 жылны сагъынылгъан кезиую бла тенглешдиргенде ол юч кереге кёпдю.

Предприятияла 1,5 минг тонна (+39%) къыйма жарашдыргъандыла. Андан сора гара эмда татлы сууланы, кёгет консерваланы производстволары да ёсгенди.