Экспорт айный баргъаны эсленеди

Россельхознадзорну Шимал Кавказда регионла аралы Управлениясыны келечилери бу айда Къабарты-Малкъардан тыш къыраллагъа жиберилген 13,6 минг тонна продукцияны тинтгендиле. Ведомствону пресс-службасындан билдиргенлерине кёре, мирзеуню эмда андан жарашдырылгъан продукцияны тышына ташыу иги да кёбейгенди.

Тенглешдирип айтханда, былтыр январьда предприятияла бла организацияла экспортха 10,5 минг тонна продукция ашыргъан эдиле. Бу айда уа 6,1 минг тонна будай, 1,5 минг тонна нартюх, 1,1 минг тонна арпа, 2,8 минг тонна будай ун, 1,2 минг тонна къышхыр эмда тахта кёгетледен 900 тонна жиберилгенди. Алыучуланы санында Армения, Беларусь, Гюржю, Иран, Ирак эм Афганистан бардыла.

Управленияда ол къыралланы быллай продукциягъа фитосанитария эмда карантин жаны бла къошакъ излемлерине бек уллу эс бурадыла.