КъМР-ни Башчысы Казбек Коков бу кюнледе бардыргъан кенгешде сёз Къабарты-Малкъарны жеринде коронавирусну жайыла барыууна къажау кюрешни юсюнден баргъанды. Сюзюуге КъМР-ни Правительствосуну Председатели Мусукланы Алий, КъМР-ни Башчысыны Администрациясыны таматасы Мухамед Кодзоков, Роспотребнадзорну КъМР-де Управлениясыны оноучусу Жирослан Пагов, КъМР-ни Правительствосуну Преджседателини орунбасары Марат Хубиев, КъМР-ни саулукъ сакълау министри Рустам Калибатов, КъМР-ни жарыкъланлдырыу, илму эмда жаш тёлюню ишлери жаны бла министри Анзор Езаов къатышхандыла.
Республикада эпидемиология халны юсюнден билдире, Жирослана Пагова школчуланы арасында ОРВИ-ден бла жангы коронавирус инфекциядан ауругъанланы саны терк ёсгенин чертгенди. Ол айтханнга кёре арт ыйыкъда башында айтылып келген къауумну арасында ауругъанланы саны 54 процентге кёбейгенди. Аны бла баламлы Оператив штаб 1-8-чи эмда 10-чу класслада окъугъанланы 26 январьдан 6 февральгъа дери солургъа жибериуню тюзге санагъанды. 9-чу эмда 11-чи класслада уа окъутуу очный амал бла бардырыллыкъды.
Андан сора да, къошакъ билим берген учреждениялада дерсле болжаллы халда тохтатыллыкъдыла. Алай бла, 102 мингден аслам школчу эки ыйыкъ чакълы бирни юйлери нде турлукъдула. Дагъыда узакъдан окъутуу амалгъа орта профессионал билим берген учрежденияла да кёчюрюледиле. Аллай мадарла адамла бир бирлери бла азыракъ тюбешир эмда бир бирге аурууну жукъдурмаз ючюн этиледиле.
Кенгешде организациялада санитар-эпидемиология излемле къалай толтурулгъанларына контроль этиллигини юсюнден да айтылгъанды. Иш бериучюле, онг болгъаны къадар, ишчилерин юйлеринден ишлерча этерге керекдиле. Ишчи кенгешлерин да видеоконференция халда бардырыргъа тийишлиди.Къырал учреждениялада да инсанла бла тюбешиуню болжаллы халда тохтатыргъа тюшерикди.Документле да «бир терезе» деген амал бла электрон халда алынырыкъдыла.
Рустама Калибатов а КъМР-ни Саулукъ сакълау министерствосуну кол-центрини иши тирилтгенин билдиргенди. Бир кёп каналлы ызгъа («122») Нальчикни поликлиникалары, жангы коронавирус аурууну тохташдыргъан эмда андан бакъгъан амбулатор арала къошулгъандыла. Районлада поликлиника бёлюмлени къошууну мадарлары этиледиле. Медицина болушлукъ керек болгъанла «122» номерге хакъсыз сёлеширге неда амбулатор аралагъа барыргъа боллукъдула.
Казбек Коков коронавирус бла байламлы халны дайымда контрольда тутаргъа, медицина болушлукъ излегенлеге аны терк тапдырыргъа буюргъанды.
