«Объект миллет проектлени жетишимли бардырылыуларыны тийишли юлгюсюдю»

Къабарты-Малкъарны Башчысы Казбек Коков 9,4 километр узунлугъу бла Прохладный-Эльхотово жолну тынгылы ремонтдан сора къууанч халлы ачылыууна къатышханды, деп билдиредиле бизге КъМР-ни Башчысыны бла Правительствосуну пресс-службасындан. Жыйылыугъа КъМР-ни Правительствосуну Председатели Мусукланы Алий, КъМР-ни транспорт эм жол мюлкюню министри Аслан Дышеков, Прохладный шахар округну, Прохладна эм Май муниципал районланы администрацияларыны таматалары, подряд организацияланы келечилери къошулгъандыла.

Республиканы оноучусу жол службаны ишчилерине Ыразылыкъ грамотала бергенди. «Быйыл ахшы ишлеген битеу жолчуланы алгъышлайма. «Къоркъуусуз качестволу жолла» миллет проектни чегинде биз Къабарты-Малкъарны жолларын, къыралны Президенти буюргъаныча, тийишли даражагъа жетдирликбиз. Республиканы жолчуларыны сынамлары барды, ала уруна биледиле. Къысха заманнга тындырылгъанды бу проект. Жол къоркъуусуз болгъанды, ишле качестволудула. Къабарты-Малкъарны жамауатына, бютюнда прохладначылагъа бла майчылагъа, ол магъаналы объектди», - дегенди Казбек Коков.

Прохладный-Эльхотово жол эки административ араны – Прохладнаны бла Майскийни, бирге къошады, эм республиканы эм кёп улоу жюрюген жол ызларындан бириди. Жол регионла аралы магъананы да тутады: Ставрополь крайдан, Шимал Осетиядан эм Шимал Кавказны башха регионларындан транзитни жалчытады. Суткагъа мында 14 мингнге дери машина барады, аны бла байламлы жол да терк бузулады. Трасса Россейни Автомобиль жолларыны опорный ызына къошулупду эм биринчи категориягъа киреди.

2020 жылда регионну Башчысыны буйругъу бла КъМР-ни Минтрансы тинтиуле бардыргъанды, жолну тийишли халгъа келтирир ючюн ишлени ёлчеми белгиленнгенди. 2021 жылда Россейни Правительствосуну себеплиги бла федерал бюджетден ырысхы бёлюннгенди.

Ишлени багъасы 600 миллион сом чакълы болгъанды. Юч къатлы асфальтобетон салыннганды, айырыу полоса тартылгъанды, жол жанлары кючлендирилгендиле, 5 километрден артыкъ бетон чеклениуле, 5 километрден артыкъ темир чеклениуле, 9 километр чакълы бир энчи таш буруула тохташдырылгъандыла. Малка черекни юсю бла тартылгъан эки автодорожный кёпюрге эм темир жолдан ётген эки путепроводха ремонт этилгенди. 6 остановка комплекс, тротуарла, энчи кнопкасы болгъан светофору бла жаяу жюрюгенле ётген жер тапландырылгъандыла. 200 жол белги, таууш этип белги берген 200 столбчукъ, 61 километрде кёнделен жол сызла жарашдырылгъандыла. Экспертле белгилегенлерине кёре, жол 1-чи техникалы категория излемлеге толусунлай келишеди.

Багъа бере, Казбек Коков былай чертгенди: «Объект заманында хайырланыугъа берилгенди. Жол служба уллу качестволу ишни тындыргъанды, ол миллет проектлени жетишимли бардырылыуларыны тийишли юлгюсюдю».

Поделиться: