Оюмларын эмда кёз къарамларын ачыкъларгъа юйретгендиле

КъМР-ни Билим бериу, илму эмда жаш тёлюню ишлери жаны бла министерствосунда «Стоп, коррупция!» деген ат бла республикалы жаш тёлю форумну ачылыуу озгъанды. Энди ол кеси да жылдан-жылгъа тёреге айлана барады.

Анга орта профессионал билим берген махкемелени окъуучулары, «Школчуланы россейли къымылдаулары» Битеуроссей жамауат-къырал сабий-жаш тёлю организацияны бизни регионда бёлюмюню келечилери къатышхандыла. Форумну хурметли къонакълары уа КъМР-ни Башчысыны Администрациясыны коррупциягъа къажаулукъ этиу жаны бла соруулагъа къарагъан управлениясыны консультанты Анета Шибзухова, жарыкъландырыу, илму эмда жаш тёлюню ишлери жаны бла министри Анзор Езаов, Прокуратурасыны коррупциягъа къажаулукъ законодательствону толтуруу жаны бла надзорлукъ этген бёлюмюню прокурору Улбашланы Фатима, МВД-ни бизни республикада экономикалы къоркъуусузлукъ эмда коррупциягъа къажаулукъ управлениясыны оперуполномоченныйи Аслан Хамизов болгъандыла. Аланы хар бири да окъуучуланы къыралны айныууна себеплик этерик оноулагъа, оюмлагъа эс бурургъа чакъыргъандыла.

Тюбешиуге келген жаш адамланы алгъышлай, Анзор Клишбиевич аланы жыл санларын эсгерте, республиканы келир заманы аланы къолларында болгъанын айтханды. Дагъыда министр саулукълу эмда тынчлыкълы жашау бла коррупция ахырысы бла да бир бирге келишмезлигин чертгенди. Коррупциягъа тёзюмсюзлюк жаланда право сакълаучу органланы эмда къырал структураланы жанындан болуп къалмай, ол затха хар инсан да уллу кёллюлюк этмезге кереклисин эмда ол ышанны магъаналылыгъын ангылатханды. Ызы бла жаш тёлюню форумну къыйматлы затланы билдирлик онгнуча кёрюрге, кеслерини жууаплылыкъларын сезерге юйренирге да унутмазгъа чакъыргъанды.

Форум ёсюп келген жашланы бла къызланы коррупциягъа къажау сезимлерин тохташдырыу мурат бла бардырылады. Ол жаш адамла кеслерини билимлерин эмда хунерлерин ачыкъларыкъ эмда таматаланы сынамлары бла шагъырейленирик дагъыда бир майдан боллугъуну юсюнден а сагъынылгъан министерствону социал-профилактика иш бёлюмюню башчысы Асият Нагоева айтханды. Сабийле форумну тренерин – Битеукавказ жаш тёлю тренинг араны директору – Екатерина Борисевични иги таныгъанларын да билдире, аны жаш тёлюню келечилери бла эндиге дери да аслам кере тюбеше тургъаныны юсюнден да хапарлагъанды. Ол тренинглени бардыра, хар заманда да жаш адамланы алларында ала тюз эсеплени чыгъарыргъа юйренирча борчланы салгъанын, сабийлени алай бла оюмларын айта билирге, кёз къарамларын эшитдирирге тюшюндюргенин да ангылатханды.

Быллай форумлагъа республиканы битеулю билим берген эмда кадет школларыны, интернатларыны келечилери да къатышханы уллу магъананы тутады. Бютюнда колледжлени окъуучулары жыл санларына кёре тапсыз къауумлагъа къошулуп къалыргъа къоркъуулу категориялагъа киргенлерин да ангылатханды А.Нагоева. Аны себепли министерство аланы сейир мероприятиялагъа къошулурларына эс бургъанлай, солуу заманларын да магъанасы бла оздурурларына къайгъыргъанлай тургъанын да белгилегенди.

Форумну ишчи программасына коррупция бла байламлы темагъа тренинг кийирилгенди. Ол кеси да оюн халда къуралгъаны себепли башха-башха жыл сандагъы сабийлени барысына да бирча ангылашыныулуду. Битеукавказ жаш тёлю тренинг арада жаш адамла бла ишни бардыргъан онюч тренер барды. Ала сабийле бла энчи халда эмда къауумла бла ишлерча программаланы, сценарийлени да къурайдыла. Тренинг оюнла тюрлю-тюрлю темалагъадыла, аланы санында конфессияла эмда миллетле аралы байламлыкъла, жамауатны аллында сёлеше билирге юйретиу, тилманчлыкъны жашырынлыкъларына тюшюндюрюу, лидер ышанла, команданы къалай къураргъа боллукъду дегенчала да бардыла.

- Келип, сабийлеге коррупция ахшы зат болмагъанын, ол жамауатха игилик келтирлик тюйюлдю деп, бош айтып къояргъа болмайды. Мен ала бу оюмгъа кеслери келирча этерге сюеме эмда ишими ол халда бардырама. Аны себепли тренингни да бу жол «Коррупциягъа сюд этиу» деген тема бла башха тюрлю форматда къурагъанма, - деп хапарлагъанды Екатерина Борисевич.

Алай бла форумгъа къатышханла кеслери окъуучуладан, студентледен да адвокат, терсленнген, шагъатлыкъ этгенле, прокурор да кимле боллукъларын сайлап, корруциягъа къажау сюдюню къалай бардырылгъанын кёргюзтедиле. Ол кезиуде уа ала ол затны жашауда орун тапханыны сылтаулары неде болгъанларын, андан къалай бла къутулургъа тийишлисин ангылайдыла эмда оюмларын да айтыргъа юйренедиле.

Тюбешиуню къурагъанланы борчу - жаш адамланы сагъышланыргъа, критикалы кёз къарамгъа, сайлау эте билиуге тюшюндюрюудю. Андан тышында да, бир берилген теманы сюзерге, аны кемчиликлерин ачыкъларгъа юйретиудю.