Республикада «Пушкинская картаны» иелери тогъуз мингден артыкъ жаш адам болгъанды

Къабарты-Малкъарда тогъуз мингден артыкъ жаш адам «пушкинская карталаны» иелери болгъандыла эм энди ала маданият жыйылыулагъа бла тюбешиулеге хакъсыз къошулаллыкъдыла. «Пушкинская карта» программа РФ-ни Президенти Владимир Путинни башламчылыгъы бла 1 сентябрьден ишлеп башлагъанды, аны борчу жаш тёлюню арасында Россейни тёрели маданият къыйматларыны юсюнден билимни ёсдюрюудю.

«Пушкинская карта» программагъа Къабарты-Малкъарны 11 маданият учреждениясы къошулады: Къырал музыка театр, Къабарты къырал драма театр, Малкъар къырал драма театр, Республикалы гинжи театр, Горький атлы къырал драма театр, КъМР-ни Миллет музейи, А.Л. Ткаченко атлы суратлау искусстволаны музейи, Б.Х. Темирканов атлы къырал филармония, «Кабардинка», «Балкария», «Терк къазакъла» ансамбльле.

«Пушкинская карта» битеу Россейде 2021 жылны декабрини ахырына дери чеклениулери болмагъанлай ишлейди, алай бла картаны Къабарты-Малкъардан сора да, къыралда жолоучулукъда болгъанда да хайырланыргъа жарарыкъды. 14-22 жыл сандагъы жаш адамла «Пушкинская карта» программагъа къошулгъан къайсы маданият махкемеде да бардырылгъан жыйылыугъа билетле сатып алаллыкъдыла.

«Пушкинская карта»  –  «МИР» тёлеу системада энчи картады, анга къыралдан ахча ётдюрюледи. Аны быйылгъы ёлчеми 3 000 сомду, 2022 жылда ол 5 000 дери кётюрюллюкдю, карта виртуал, пластик халлы да болургъа боллукъду. Картагъа ётдюрюлген ахчаны жаланда маданият махкемеледе маданият жыйылыулагъа къоратыргъа жарарыкъды: спектакльлеге, кёрмючлеге, концертлеге, фестивальлагъа. Ахчаны барын да жылны ахырына дери къоратыргъа тийишлиди, алай болмаса ол «кюерикди». «Пушкинская картаны» «Госуслуги. Культура» мобил приложенияны телефоннга тохташдырып, заявленияны толтуруп, «Госуслуги» порталны хыйырланып жарашдырыргъа тийишлиди. 

Поделиться: