Агъачны ёртенден къоруулаугъа – аслам эс

 «Агъачланы сакълау» федерал эм «Экология» миллет проектлеге кёре,  быйыл тийишли жумушлагъа  федерал бюджетден  31 126,4 минг сом, ол санда  агъачланы жангыртыугъа  8106,7 минг сом бёлюннгенди.

КъМР-ни  Табийгъат байлыкъла эмда  экология министерствосу быйыл 102 гектарда терекле орнатханды, ол санда 47 гектарда игилендириу ишле бардырылгъандыла эм 55 гектарда да башха борчла  тамамланнгандыла.   Алай бла белгиленнген пландан жюз процент толтурулгъанды.

  Пректни чеклеринде агротехника ишле этиледиле  – къалын ёсген, чириген, ауругъан терекле, жерге тюшген бутакъла кетериледиле, талалада жаш битимчикле орнатылынадыла эм башха жумушла тамамланадыла.  Ол санда жаз башында бла  кюз артында  от тюшмезча къоркъуусузлукъгъа  аслам эс бурулады.

Аны бла байламлы быйыл   беш от ёчюлтюучю техника бла  58  оборудование, бир энчи техника эм аллай бир да оборудование алыннганды. Ала аукцион бла учуз  табылгъанлары  ючюн 4,4 миллион сом экономия этилгенди. Алай бла от ёчюлтген  техника    бла оборудование 97 процентге  жангыртылгъанды.   Болсада федерал бюджетден бёлюннген  ахча саулай  проектге къоратылыргъа кереклиси ючюн, кёп болмай ГАЗ 33086  автоцистерна  машина келтирилирча Рослесхоз бла келишим этилгенди.

Магометланы Сулейман.
Поделиться: