Къабарты-Малкъарда "Агъачны сакълайыкъ" деген акция башланады

Къабарты-Малкъар Республика «Агъачны сакълайыкъ» деген битеуроссей акциягъа къытышыркъды. Ол акция ючюнчю жыл бардырылады, ол кезиуню ичинде россейли регионлада 80 000 000 терек орнатылгъанды, деп билдиреди регионну оноучусуну пресс-службасы.

 «Агъачны сакълайыкъ» деген акция жамауатны эсин Россейни агъач байлыгъын сакъларгъа эм аны байыкъландырыгъа  деп бардырылады.

Къабарты-Малкъарда  акцияны кезиуюнде паркла эм элле тёгереклеринде  жашиллендириу ишле бардырыллыкъдыла.

Акция биринчи ноябрда 10 сагъатда Нальчикде башланырыкъды, Таман дивизиялы орамда Хорлауну паркында  200 жаш терекчикни орнатырыкъдыла. Аллай ишле  ноябрь айны аллында республиканы битеу муниципал къуралыуларында бардырыллыкъдыла.  Битеу да 2500 тюрлю-тюрлю жаш терек салынырыкъды.

Аланы Къабарты-Малкъарны агъач питомниги хазырлагъанды. Бу акциягъа битеу сюйгенле къатышыргъа боллукъдула.

«Агъачны сакълайыкъ» акцияны  РФ-ни Табийгъат байлыкъла эм экология министерствосу, Агъач мюлк федерал агентствосу, регионланы муниципалитетлери, «Эсде туту терек бахча» деген волонтер организация къурагъандыла.

 Эсигизге салайыкъ,  2021 жылда «Экология» деген миллет проектни «Агъачны сакълайыкъ» деген федерал проектни чеклеринде агъачланы сакъларгъа эм аланы санларын ёсдюрюрге бизни республикагъа 31 миллион сом бёлюннгенди. Ол проектни жашауда бардыра, быйыл жаз башында республиканы агъач мюлкюню фондларында Къабмалкъагъачпитомник ёсдюрген 420 минг терекчикни орнатхандыла.

 Бизни корр.