Къол кётюрюуню тийишли халда барыууна – энчи эс

Къабарты-Малкъар Республиканы Башчысы Казбек Коков айырыулагъа къарау жаны бла штаб болгъан эм айырыуланы тийишлисича бардырыуларына эс бургъан жамауат къарауну арасы ачылгъан КъМР-ни Жамауат палатасына баргъанды.

Къол кётюрюулени юч кюнюнде – 17,18 эм 19 сентябрьде – мында айырыу участкаладан трансляция бардырыллыкъды, эм жамауат штабны келечилери онлайн халда къол кётюрюуню баргъаныны юсюнден билгенлей турлукъдула. Ара участок эм жер-жерли айырыу комиссиялада болумну мониторингин этерикди, айырыу комиссияла, СМИ-ле эм къараучула бла байламлыкъланы жалчытырыкъды.

КъМР-ни Жамауат палатасыны председатели Хазратали Бердов къараучуланы ишлерини юсюнден хапарлагъанды, ол санда муниципалитетледе да. Дежурстволаны графиги тохташдырылгъанды, тюненеден башлап къараучула жумушларын тамамлайдыла. Айырыулагъа къарагъан жамауат штаб эм жамауат къарауланы арасы суткаланы ичинде ишлерикдиле.

Араны ишине регион Жамауат палатаны келечилери, КъМР-де Адамны эркинликлери жаны бла уполномоченный, жамауат къараучула, СМИ келечиле, тийишли заман болжалгъа кёре заявка берген айырыу эркинликлери болгъан инсанла, сора политика партияланы келечилери къошуладыла. Айырыу участкалада къол кётюрюуге 710 бойсунууда болмагъан къараучу къарайдыла.

Казбек Коков къараучула эм информация системаны операторлары бла ушакълашханды, алагъа тёзюмлюлюк эм жетишимли иш тежегенди.

«Жамауатны жанындан быллай контроль болгъан была бизге биринчи айырыуладыла. Информация таблода участкалагъа онлайн халда къараргъа боллукъду, болум жаздырылгъанлай турады. Партияны хар келечиси айырыуланы баргъанларына къараргъа боллукъду.  Ол айырыу ишни тап халда барыууна магъаналыды, контроль этиуге болушады, бир-бир чыгъарыкъ сорууланы кетереди – хар участканы не заманда да ачыкъ кёрюрге болады», - дегенди КъМР-ни Башчысы, журналистлени сорууларына жууаплай.

«Ол бюгюнлюкде политика кюрешге кирген политика партиялагъа угъай, властьха да магъаналыды. Биз адамланы халлерин шарт ангыларгъа тийишлибиз, ол санда инсанланы ыразылыкъларын билдириулерине кёре да: къайсы политика кючге ала къол кётюрлюкдюле? Къайсы программа, къайсы платформа адамлагъа бюгюнлюкде магъаналыды? Жамауат контроль система да инсанланы политика сайлаулары туура болурча къуралгъанды», - деп чертгенди Казбек Коков.

«17 сентябрьде республикада битеу 355 айырыу участкала ишлерин башлагъандыла, инсанла къол кётюредиле, тарыгъыула алыкъа болмагъандыла», - деп белгилегенди республиканы Башчысы.