Баш тема – школланы тынгылы ремонтларыны программасын жашуада бардырыу соруула

Къабарты-Малкъарны Башчысы Казбек Коков Регионланы айнытыу жаны бла правительстволу комиссияны  штабыны кенгешине къатышханды. Анга председательликни Марат Хуснуллин этгенди.

Жыйылыуда школланы тынгылы ремонтларыны программасын жашауда бардырыу соруула сюзюлгендиле. Программаны бардырылыуун сюзюуге «Единая Россия» партияны Генеральный советини Секретары Андрей Турчак, «Сириус» билим бериу араны таматасы, РФ-ни Президентинде Илму эм билим бериу жаны бла советни президиумуну келечиси Елена Шмелева, РФ-ни жарыкъландырыу министри Сергей Кравцов, регионланы таматалары къошулгъандыла.

Марат Хуснуллинни айтыууна кёре, эки жылгъа Россейде 3 мингден аз болмагъан битеулю билим берген школлагъа ремонт этилликди, тийишли бешжыллыкъ программа Россейни Президенти Владимир Путинни «Единая Россияны» 19 июньда съездинде берген буйрукъларыны чеклеринде къуралады. Къырал советни президиумуну жыйылыуунда Президент Елена Шмелеваны школланы ремонтларын комплексли халда бардырыргъа деген предложениясын дурус кёргенди.  Анга кёре жаланда мекямланы тапландырып къоймагъанлай, аланы ичиндеги затла эм шёндюгю оборудование бла жалчытылыныуларын игилендирикдиле.

Июльну ахырында «Единая Россия» Жарыкъландырыу министерствону таматаларына тынгылы ремонт изленнген 7 200 мектепден къуралгъан тизмени бергенди. Ишлени битеу кезиулерине – проектден башланып регионлада приёмкагъа дери – ишчи къауумла къарагъанлай турлукъдула. Регионла, программагъа къатышырча, тюзетилген кёрюмдюлерин 10 октябрьге дери белгилерге тийишлидиле.

Къабарты-Малкъар Республика федерал министерствогъа 63 школда 73 мекямгъа регион программагъа къошулуп ремонт этилирге тийишли битеулю билим берген организацияны тизмесин бергенди. Быйыл регион бюджетни эм «Эл тийрелени комплекс халлы айнытыу» программаны ырысхыларына республикада Залукокоажеде эм Пролетарскоеде школланы тынгылы ремонтлары этилгенди, жылны ахырына дери  Тёбен Черек эм Малка элледе мектеплени тынгылы ремонтларын тындырыргъа мурат барды. Каменномосткоеде школну къаты желден сора бузулгъан жерлери болгъан юй башына ремонт этилликди.

Андан сора да, жыйылыуну чегинде регионлада миллет проектлени бардырылыуларыны кезиулю эсеплери сюзюлгендиле. Къабарты-Малкъар «Къоркъуусуз эм качестволу жолла» миллет проектни быйылгъы чеклеринде бардырыу, жол къурулушну проектлерин жашаугъа кийириу, эл тийреледе жол инфраструктураны тапландырыу жаны бла контракт ишлени тап къурагъан  5 алчы регионланы санына киргенди.

Республика 2019-2021 жыллада тозурагъан жашау журтладан кёчюрюу программа эм ахшы шахар болумла къурау жаны бла Битеуроссей эришиуде хорлагъан проект бла – Чегем-парк – жетишимлилени санындады. Регион жашау журтланы ипотека кредитованияларыны ёсюую бла да он иги субъектни тизмесиндеди.  Жылны аллындан бери берилген ипотека кредитлени ёлчеми 7 миллиард сом чакълы бир болгъанды, былтыр бла тенглешдиргенде ёсюм 77,5 процентди.