Кёпюрню кемчиликлери кетерилгендиле

Алгъаракълада битеуроссей халкъ фронтну (ОНФ) Къабарты-Малкъарда бёлюмюню келечилери шахарчыланы тилеклери бла «Нальчик» темир жол станцияны тийресинде адамла жюрюген кёпюрню болуму бла шагъырейленнгендиле. Аны чеклеринде объектни пандуслары эм тийреси да тозурагъанлары ачыкъланнганды. Ол себепден жамауатчыла къысха заманда кемчиликлени кетерирге кереклисин мериягъа эсгертгендиле.

Эсге сала айтсакъ, объектни игилендирирча мадар этилирге тийишлиси айтыла тургъанды. Бир ай мындан алгъа социал сетьледе шахарны администрациясы объектни тинтирге излейди, деген билдириу чыкъгъан эди. Алай тийишли инстанцияла анга эс бурургъа ашыкъмагъандыла.

ОНФ-ны келечилери айтханнга кёре, алайда уллу жауунладан сора терен кёл жыйылып адам басмазча болады. Аны хатасы уа эм алгъа «Завокзальный» микрорайонда жашагъанлагъа жетеди. Аны ишге жюрюгенле, 4-чю номерли гимназияда окъугъанла, пенсиячыла, сабийлерин коляскалада элтген анала да тири хайырланадыла. Бюгюнлюкде игилендириу жаны бла тийиши ишле бардырылып, кёпюрню тийреси мардалагъа келиширча болгъанды.  

- Окъуучуланы кёбюсю былайтын къысха жол бла барыргъа сюедиле. Бу кюнледе уа жангы окъуу жыл башланнганды, ол себепден ала тынч эм къоркъуусуз жол сайларча мадар этилгенди. Биз мериягъа билдиргенибизден сора кёпюрден Жуковский эм Куашев атлы орамла таба тюшген жерде жангы тротуар ишленнгенди, асфальт жайылгъанды эм пандуслагъа да къаралгъанды - дегенди ОНФ-ну жашау журт эмда шахар болум жаны бла бёлюмюню эксперти Ислам Макоев.

Ол республиканы башха жерлеринде проблемалы участоклада мониторинг бардырлыкъларын да къошханды. 

Магометланы Сулейман.
Поделиться: