Сурат буруннгулулугъубузну бир шартымы болур?!

«Къая башында суратда не болгъанын сизге билдирирге излей, къолума къалам алгъанма. Къарачай-малкъар халкъны тарыхында эм эртте басмаланнган зат олду деп айтыргъа боллукъду. Муну хайырындан Америка бизникиди дерге базынмасакъ да, континентни биз ачханбыз дерге уа эркинбиз. Анга шагъатлыкъны бу сиз кёрген сурат этеди», - деген эди 2015 жылда суратны редакциягъа келтиргенинде Атталаны Анатолий. Хапарны да аны ол заманда айтханларына кёре хазырлагъанбыз.

Сурат, Американы тау каньонларыны биринде ишленнгенин айта, анда бояула жер жюзюнде тюбемегенлерин да белгилей эди Атта улу. Бу биз кёрген суратдагъыланы саны сегизеуленди – ючюсю тиширыу, бешиси уа – эр киши. Онгдан солгъа къарасакъ, экинчиси бек мазаллы  адамды, кеси да жамычысы бла сюеледи. Бёрк орунуна скафандр кийипди, кёкюрегинде да тюрлю-тюрлю приборла.

Анга ушагъан бешинчи уа чепкен кийипди, аны да ёшюнюнде аллай затла тагъылыпдыла. Суратдагъыланы барысыны да юс кийимлери таулуланы бурун замандагъы быстырларына ушайдыла. Аякъ кийимлери уа гён чарыкъла тюйюлмюдюле?

Была жамычысы болгъан эр киши бла тюбеширге келгеннге ушайдыла. Башда сагъынылгъан экинчи бла тёртюнчю инсанла гъаршдан тюшгенчадыла. Ала ким эселе, къайдан эселе да къарачай-малкъар халкъны озгъан заманын баямлайдыла.

Жютюрек кёз бла тинтсек, суратны магъанасы бизге бютюнда келишгенчады. Къарачыгъыз бу жерге – бюгюнлюкде бизни орамларыбызда ишленнген хуналагъа ушаш жерде сюеледиле ала. Бу тийрелеге американлыла каньон дейдиле. Ма былайда жетебиз бек магъанасына.

Суратны Америкада жюрюген аты – «Къойаанасиджаси». Бу сёзле огъары малкъар диалектибизде жазылгъандыла. Ол а бизни буруннгулу, эртте, таш бла бирге жаратылгъан халкъгъа къошады.  

Былайда халкъыбызны келечилерине бир айтыр затым барды. Хар бирибиз да уллу жетишимибизни баямларгъа, туура этерге болушхан бу сейир суратха къарап буруннгулулугъубузну шартларыны юслеринден сагъыш этерге боллукъбуз.