Къоллары – чемер, кёлю - жарыкъ

Биринчи кере тюбешгенимде окъуна сезген эдим ол хунерли адам болгъанын. Алайсыз а къалай? Кёзлери жарыкъ,  санларын тири къымылдатады… Мени бла ушакъ  эте, къолундан ишин кетермейди: юзмелтчикни ары бла бери айландырып ийлейди. Бир кесекден  стол юсюне салып жаяды. Къолларыны къымылдагъанлары тохтагъанда, тюрслеп къарасам - тюльпан гюлню сураты.

Азаматланы Халимат художестволу вузда окъумагъанды. Анга ол фахмуну Аллах бергенди. Ол республикада, андан тышында да къол усталаны кёрмючлерине къатышып, атын айтдыргъанды. Дипломла, грамотала бла  да кёп кере белгиленнгенди.

Усталыкъ – ол жюрекни халыды, аберини башхаладан эсе энчи кёре, эслей билиудю. Аланы аны да ёсдюрюрге тийишлиди, аны ючюн а кюнден-кюннге алгъа итинирге,  жангычылыкълагъа эс бурургъа, аланы хайырланыргъа керекди. Халимат аллай адамды. Аны бла бирге уа оюмлуду,  жарыкъ кёллюдю. Сейир ушакъ нёгерди.

Халимат Нальчикде Тембора Мальбахов атлы библиотекада саулукъларында къыяулары болгъан адамланы кесини усталыгъына юйретеди. Аны  кёпле таныйдыла, биледиле, анга кёпле тартыладыла. Юйюнде да ол жарыкъ къонакъбайды, этген аш-сууу татыулуду, татымлыды. Чынтты таулу тиширыу. Баш иеси Батчаланы Исмайыл анга таянчакълыкъ этеди,  хунерлигине ёхтемленнгенин да букъдурмайды.

Устаны чыгъармалары башхаланыкъыладан иги да айырмалыдыла. Сёз ючюн, ромашка гюлню ишлер ючюн ол аллай бир кюч салгъанды! Хар  чапырагъын кертича кёргюзтюрге кюрешип, алагъа къарасанг, тёгерегинде агъачдан ишленнген чеклеулери болмаса эди, талада ёсген керти табийгъатны кесекчиги сунар эдинг.

Аны суратларына жууугъуракъ келсенг, неда къолунг бла тийсенг, ма ол заманда  билликсе аланы жалгъан гюлле неда  бир башха сыфатла болгъанларын. Аланы хазырлай, хунерли тиширыу тюрсюнлю жюнню, тасмаланы хайырланып, аланы бютюн айбат, кёзге  хычыуун кёрюнюрча этеди. Аны чыгъармаларына къарап, бир нёгерим: «Мен поэт болсам эди, былайда  окъуна, бу ишлеге атап, назму жазар эдим!»-дегенди.

Бир жыл а Жангы Малкъарда Азаматланы арбазларында сирень юлкю чагъады. Халимат анга жоралап, бир талай аламат сурат жарашдыргъанды. Таулу тиширыуну ишлерини саны да кёпдю. Алада, гюлледен сора да,  юйчюклени, суу жагъаланы, уллу тереклени кёрюрге болады. Ол хазырлагъан суратлагъа,ишлеген затларына къарап турлугъунг келеди, нек дегенде ала кёзню эрикдирмейдиле, арытмайдыла. Ол тюйюлмюдю чынтты фахмулулукъну шарты.

Аны юсюнден жерин, журтун, адамын сюйген инсан деп таукел айтыргъа  боллукъду. Аны тёгерегинде жашау жарыкъды, хар зат тебиудеди.

Холаланы Марзият.
Поделиться: