Жорукълагъа оюн халда тюшюндюре

МЧС-ни баш борчларындан бири сабийлени солуулары къоркъуусуз ётерча мадарла этиудю. Нальчикде гитчеле тургъан санаторийле, турист базала асламдыла, бери къыралны жер-жерлеринден кёп адам келеди. Аланы  республикада солууларына чурум чыкъмазча министерствону келечилери «Кавказ» санаторийде профилактика ишле бардыргъандыла.

МЧС-чиле сабийлеге от тюшюуден сакъланыуну жорукъларын ангылатхандыла, от тюшгенини сылтауларын эсгертгендиле, къутхарыу службаны чакъырыргъа, жана тургъан мекямдан терк чыгъаргъа юйретгендиле. Лекциядан сора уа от тюшюуге къажау-къутхарыу спортну ышанлары бла эришиуле, викторинала бла конкурсла къурагъандыла. Сабийле, эки къауумгъа юлешинип, заманнга от ёчюлтюучю кийимлерин кийгендиле, снаряженияны жыйышдыргъандыла. Ызы бла асфальтда суратла ишлеп, канатны тартып сынашхандыла, от ёчюлтюу эстафетада эришгендиле. Гитчеле барысы да конкурслагъа кёллери бла берилгендиле, алай бла шуёхлукъ хорлагъанды. 

Тюбешиуню эм сейир кесеги уа мчс-чиле от ёчюлтюу техниканы, жана тургъан жерге къалай жууукълашып ёчюлтгенлери, ачыгъанны къалай чыгъаргъанларын кёргюзтгенлери болгъанды. Сабийле ол кюн, заманларын да зауукълу ётдюре, кёп жангы, жашауда керекли билим алгъандыла. 
Андан сора къутхарыучула юйретиу эвакуацияны бардыргъандыла, устазла, санаторийни келечилери бла инструктаж ётдюргендиле.