Бу кюнледе мен, бизни юйюбюзде болгъан битеу абаданла да, Нальчикде 1-чи номерли поликлиникагъа барып,коронавирусха къажау дарман салдыргъанбыз. Укол этдирирге кезиулерин сакълагъанла ол кюн бир заманда да болмагъанча кёп эдиле. КъМР-де УФСИН-де къуллукъ этгенле да аслам санда келип тура эдиле.
Мен кезиуюмю сакълап тургъанымда, танышларыма да тюбегенме, аланы бир-бирлери бла ушакъ да этгенме.
Хочуланы Фатимат, юй бийче, пенсиячы:
- Мен экинчи уколну этдирирге келгенме. Жюрегимден дарманла ичгенлей турама, къан басымым да къыйнайды. Сора туудукъларым да орамдан чыкъмайдыла, башха сабийле бла ойнайдыла, келиним, жашым да кюн сайын ишге жюрюйдюле. Ма ол затланы эсге алып сагъыш этгенме да, дарман салдырыргъа таукел болгъанма.
Шауаланы Светлана, пенсиячы:
- Бу осал ауруудан къыйналгъанла, аны къой, ауушханла да асыры кёпден, эшикге чыгъалмай къалгъанбыз. Къууанчны айтмайма, къайгъы сёзге окъуна баралмайбыз къоркъмай. Жууукъдан, тенгден, къоншуладан да айырылып къалабыз. Энди Къурманда да телефон бла алгъышлап къойгъан болмаса, барып, къартларыбызны, саусузланы да жокълаялмагъанбыз. Ол затланы эсге алып, келип дарман салдыргъанма.
Кючмезланы Тахир, врач:
- Мен элге келсем, къабырлагъа бармай къалмаучума. Бу жол да алай этгенме. Хасанияны башында къабырлагъа баргъанымда, арт эки жылны ичинде бек кёп адам ауушханын кёрюп, жюрегим къыйналгъанды. Жууукъларым айтханнга кёре, аланы иги кесеги коронавирусдан ёлгендиле.
Кесим да ишлеген жеримде кёплени бу ауруудан къыйналгъанларын кёргенме. Аны себепли эллилеримден тилейме: этдиригиз вакцинацияны, къыйнамагъыз кесигизни, башхаланы да. Ийнаныгъыз манга: бу аман ауруудан къутулууну жаланда бир амалы барды - дарман салдырыу.
Жолайланы Тахир, къурулушчу:
- Дарман салдырмагъанланы, керексиз хапарла жайып айланнганланы да мен жууапха тартырыкъ эдим. Биз юйюрюбюз бла барып этдиргенбиз укол. Аны ючюн а ишден бир кюннге да тохтамагъанбыз. Биз а тёртеулен болабыз.
Хасанияда арт жыл бла жарымны ичинде не къадар адам ёлгенди. Ма, тюнене да биреуленни асырадыкъ. Ол да коронавирусдан ауушханды. Адамла кеслерини, тёгерекдегилени да юслеринден нек сагъыш эте болмазла?
Иванов Пётр, Пятигорскдан келген къонакъ:
- Анам Нальчикде турады да, иш этип келгенме аны поликлиникагъа элтирге. Къарт адам ауруулагъа чыдамсызды, бу кюйсюз инфекция анга жукъса уа, кётюралмаз деп къоркъгъанма. Алай жарсып тургъандан эсе, дарман салдырса иги тюйюлмюдю?
Алийланы Мадина, устаз:
- Бизни школда кёп сабий, устаз да ауругъандыла ковидден. Манга да жукъгъанды бу вирус. Пандемия башланнган биринчи айлада ауругъанма, антителаларым да бар эдиле. Бусагъатда уа, анализле бергенимден сора, ала жокъ болгъанларын билгенме да, дарман салдырыргъа келгенме.
Батчаланы Тамерлан, предприниматель:
- Ишим бла байламлы кюн сайын иги кесек адам бла тюбеше турургъа тюшеди. Аны себепли кесими, юйдегилерими да сакълар хыйсапдан дарман салдыргъанма. Юй бийчем, къыз, жаш да алай этгендиле.
