Тилибизни, тарыхыбызны, ахшы адет-тёрелерибизни сакъларгъа

Бизни редакциябызны келечилери озгъан орта кюн узакъ эллерибизден бирлеринде – Хабазда бла Кичибалыкъда - къонакъда болгъандыла. Алада администрацияланы башчылары бла тюбешиулеге эллени къартлары, устазлары, врачлары эм башхала да къатышхан эдиле. Ала бла ушакълада газетни келечилери эллерибизде жашау болумну, адамланы харкюнлюк жарсыуларыны, ала «Заманны» бетлеринде не затланы юсюнден басмаланса сюйгенлерини юсюнден соргъан эдиле.

«Бу тюбешиу бла биз журналистлерибиз эрттеден бери бармагъан эллерибизге кезиу-кезиу чыгъаргъа умут этебиз. Жер-жерледе жашау болумгъа кеси кёзлерибиз бла къараргъа, элчиле бла ушакъ этерге, окъуучуларыбызны хунерли, жетишимли, иш кёллю адамларыбыз бла шагъырейлендирирге сюебиз. Аны бла бирге элледе жарсыуланы, кемчиликлени да туура этерге, окъуучуларыбыз бла арада байламлыкъланы кючлендирирге таукелбиз», - дегенди «Заманны» баш редактору Къонакъланы Хасан Хабазда жыйылыуда.

Ол дагъыда миллетге газет бек магъаналы болгъанын, ол аны къыраллыгъын кёргюзтгенин чертгенди. «Арт жыллада, электрон СМИ-ле айный баргъан сагъатда, анга жазылыу азая тебирегенди. Алай не десе да, къагъытда чыкъгъан газет халкъгъа бек керекди. Биз аны электрон тюрлюлерин айнытыуну да къолгъа алгъанбыз. Сёз ючюн, энди аны Инстаграмда да табаргъа боллукъду», - деп къошханды ол.

Айтханыбызча, тюбешиуледе газетни бетлеринде къаллай материалла кёрюрге сюйгенлерини, къайсы тюрлю кемчиликлеге эс бургъанларыны юсюнден кёпле айтхандыла. Бегирекда эллерибизни, жерлерибизни тарыхыны, адабиятны, маданиятны, белгили адамларыбызны юсюнден асламыракъ жазаргъа, дагъыда кеслери къурагъан жалгъан тарых шартланы жайып тургъанлагъа къажау турургъа чакъыргъандыла. Хар не да къуруда мюлк неда ырысхы байлыкъ бла тергелмейди, миллетни аллай хазнасын, ата-бабаларыбыздан бери келген адет-тёрелени, тилибизни сакълаугъа адамларыбыз эм уллу магъана бергенлерине сёз да жокъду. «Кесибизни даражабызны тута, кётюре билирге керекбиз. Алай болса, бирси миллетле да ол кёзден къарарыкъдыла бизге», - деп чертгенди малкъар тилден устаз Аппайланы Мурадин.

«Элибиз маданият, социал жумушлагъа да тири къатышады, районда бардырылгъан аллай ишледен артха турмайды, жетишимли, белгили адамларыбызны юслеринден сюйюп айтабыз», - дегенди Хабазны администрациясыны  башчысы Тюбейланы Марина.

Элни китапханасыны таматасы Богъатырланы Елена тилибизни юсюнден асламыракъ жазаргъа чакъыргъанды: «Сабийле бизге келселе, мен тауча айтсам, орусча жууап бередиле. Ол бек жарсытады. Садикде да алай сёлешедиле, школда да, баям, алай болур. Биз кеси ичибизде аны юсюнден дайым айтып турабыз, сиз да газетни бетлеринде анга асламыракъ эс бурсагъыз эди». «Сабийле суратлау фильмлени башха тилледе къарап, кесибизни тилибизни унутуп барадыла. Садикден сора школгъа келгенле тауча айтханыбызны ангыламайдыла – ол жарсыу тюйюлмюдю?» - деп соргъанды Аппай улу.

Жыйылыуда халкъгъа иш кёллю, юлгюлю, тири жаш адамланы юсюнден да билдирип турургъа кереклисин чертгендиле.

Кичибалыкъда тюбешиуде да ушакъ ол халли ётген эди. Анда да элни къайгъылары, элчилени оюмлары, сагъышлары, тамблагъы кюннге кёз къарамлары… Къайсылары бла сёлешгенде да, ала миллетни тарыхын, тилин, тин хазнасын сакълаугъа бек уллу магъана бергенлери шарт кёрюне эди. Дагъыда жаш тёлю иш тапмай тышына кетип баргъанын, элде болгъан онгланы ойлап, урунургъа анда жеринде амал табаргъа кереклисин да айтханла болгъандыла. Акъыртын, терк болса да, жашау аз-аздан игилене баргъанын белгилеп, адамла газетни бетлеринде тири, хунерли, иш кёллю инсанланы юслеринден да асламыракъ кёрюрге сюйгенлерин чертгендиле.

Улбашланы Мурат.
Поделиться: