Жаш тёлюню келлик цифралы болумгъа хазырлай

Озгъан жылны август айында Россейни гитче шахарларыны бла эл школларыны  мурдорларында «Точка роста» цифралы билим бериуню эмда гуманитар  профильлени аралары ачылгъандыла. Къабарты-Малкъарны 27 мектеби да аланы санындады. Аралада «Технология», «Информатика», «ОБЖ»  предметлеге  бютюн  уллу эс бурулады.

Аны бла байламлы  районланы билим бериу учрежденияларына ЗD оборудование, квадрокоптерле, шахматлагъа тюшюнюрге юйретген комплектле, интерактивный комплексле да келтирилгендиле. Бийик технологияланы хайырланыу а цифралы эмда гуманитар профильли предметлени къыйматларын ёсдюрюрге себеплик болгъанларындан сора да, окъуучула жангычылыкълагъа – 3D моделированиягъа, прототипированиягъа, чертёжланы компьютерни болушлугъу бла жарашдырыугъа, цифралы пространствону ангыларгъа, стратегиялы жаны  бла оюмларгъа тюшюнюрюкдюле.

Эсигизге салайыкъ, мектепледе быллай арала РФ-ни Президенти Владимир Путинни «Билим бериу» миллет проектни тамамлауну чеклеринде буйругъу бла «Шёндюгюлю  школ» федерал проектни жашауда бардыра къураладыла. Белгилегенибизча,  Россейни Билим бериу эмда  илму министерствосу Къабарты-Малкъарны бу жангы  программа бла ишлерик пилот регионланы тизмесине кийиргенди.

Быллай арала  Элбрус районну эки школунда – Быллымда   Ахматланы Ахмат атлы эмда Кёнделенде Доттуланы Ахмат атлы мектепледе ачылгъандыла, Черек районда да аллай жумуш эки школда бардырылгъанды.   Аушигерде  бла Бабугентни Батчаланы Роза атлы мектебинде да «Точка роста» арала кёплени къууандыргъандыла. Аланы къурауну мураты уа жаш тёлюню келлик цифралы жашаугъа хазырлауду, ала уа къаллай болса да бир усталыкъны жаратып, сайларла, деген хыйсап барды.

 Аны бла байламлы таулу элде да эки кабинетни  бусагъатдагъы излемлеге тийишлиликде жарашдыргъандыла. Жангы оборудованиени уа Владивостокдан (квадрокоптерле), Къазандан (техникалы  чыгъармачылыкъгъа керекли инструментле) жибергендиле. Дагъыда  3D принтер, он эм кючлю  ноутбук да келтирилгендиле. Бу арагъа башчылыкъны уа математика, информатика жаны бла  да тутхучлу билими, окъууу да болгъан Чочуйланы Лариса Тахировна  этди. Дагъыда ол эки класс отоугъа тынгылы мебельге деп 120 минг сом Черек районну администрациясыны башчысы  Муртазланы Борисни болушлугъу бла бёлюннген эди.

Окъуу жыл бошалгъанды. Битеу башда айтылгъан затла да тынгылы асыралгъандыла. Былайда директор Мокъаланы Даниял Халимович мектебге  таматалыкъ этип тебирегенли жыл сайын жаланда косметикалы  ремонт угъай, бир белгили затха тынгылы ремонт этиуге эс буруп ишлегенин белгилесек, бюгюнлюкде мектеп ахшыланы санындады.

Сёз ючюн, 1958 жылда хайырланыргъа берилген мекямны ичинде алгъын къуру бир кран бар эсе, шёндю ары жылы суу, канализация да тартылгъандыла. Биринчи къатысындагъы полла саулай да бюгюннгю къурулуш материалла бла алышындырылып, алада бояу ишле бла кюрешмейдиле. Чардагъы да толусунлай жангыртылгъанлы иги кесек заман озгъанды. Класс отоулада, коридорлада да бусагъатдагъы излемле бла  къабыргъалары тышланнгандыла.

Школну спорт залы уа не заманда да аны ёхтемлиги болгъанын анда окъугъанла, ёсгенле бютюн биледиле. Ол республикада да айырмалыланы тизмесиндеди. Аны да полу алышындырылып, кёп жылланы турлукъ материал салыннганды. Терезелерине топ тийип сындырмазча, ич жанындан ууакъ сырылгъан темир сетка тартылгъанды. Балконунда  да  плитка, паркет да салыннгандыла. Быйыл да бир къауум ишле тамамланырыкъдыла. Къысха  айтханда, мектеп окъуу жылгъа тынгылы хазырланып  тюберикди.

 Бу окъуу юйню бойсунууунда Бабугентде эки  сабий сад да бардыла. «Назычыкъ», «Чынарчыкъ». Биринчиси жангы мекямды, ол хайырланылыргъа 2014 жылда берилген эди. Кеси да школну къатында орналгъанды. Болсада жыл сайын  экисини да хар керекли затына къарагъанлай, сабийлеге таплыкъгъа къайгъыргъанлай турадыла.

«Чынарчыкъны» тышын да омакъландыргъандыла, жылы сууу болурча этилгенди, канализацияны  бир кесеги да жангыртылгъанды. Чардагъын къанжал бла жапхандыла, арбазында асфальтын  а Шунгарланы Саматны болушлугъу бла жангыртхандыла.

Саулай да алып айтханда, садланы экисине да эки жюзге жууукъ жашчыкъ бла къызчыкъ жюрюрюкдюле. Аланы уа хар биринде да тёртюшер къауум барды. Алайды да, энди садлада жерле жетмей да башлагъандыла.

Регионда 2021-2022 жыллагъа «Демография» миллет проектни чеклеринде школгъа дери билим бериу бла гитчелени 100 процентге жалчытыугъа эс бурулады. Аны бла байламлы  Бабугентде жангы ясли-сабий сад да ишленирикди .

Жаланда жыл сайын бардырылгъан ремонтну заманында  угъай, башха кезиуледе да ата-анала  школну жашауундан кери турмай, аны бла байламлыкъ жюрютедиле. Элни администрациясыны башчысы Османланы  Мухтар да алагъа дайым болушлукъ этгенлей, жарсыуларына къолундан келгенича  къайгъыргъанлай тургъанын айтып, Мокъа улу аланы барысына да ыразылыгъын билдиргенди.

Батчаланы Роза атлы окъуу учреждение айырмалыланы сатырында болгъанлай келеди. Анда ким да юлгю алырча коллектив да ишлейди. Школ мындан арысында да жетишимлери бла анда алгъын эмда бюгюнлюкде окъугъан неда билимни жолуна энди атламларын аллыкъланы барысын да къууандыргъанлай турлугъуна ышанабыз.