Окъуучулагъа - грамотала, устазлагъа – ыспас сёзле

 Нальчикде биринчи номерли  санатор-лесной школ ачылгъанлы быйыл жетмиш жыл болгъанды. Анга эмда Аналаны кюнюне  жораланып бу кюнледе анда конкурс бардырылгъанды. Аны уа Нальчик шахарны тиширыуларыны совети  юйюрню даражасын кётюрюу жаны бла  проектге кёре къурагъанды.
 Бу багъыу эмда окъутуу учрежденияда тургъан къызчыкъла бла жашчыкъла ананы юсюнден хапарчыкъ, назмучукъ жазаргъа, сурат ишлерге, къагъытладан, башха затладан абериле этерге, шатыкъ сёлеше билгенлерин кёргюзтюрге керек эдиле. Аллай эришиулеге 60 чакълы бир школчу къатышханды. Ала республиканы кёп эллеринден келгенле эдиле, Узбекистандан, Ингушетиядан да келечиле болгъандыла.
Жазгъанларын а алгъадан окъуна советге  жибергендиле. Алагъа журналистле  Байсыланы Марзият бла Ирина Садовникова, КъМР-ни Гуманитар тинтиуле институтуну бёлюмюню таматасы, филология илмуланы доктору Мадина Хакуашева да къарап,  игилерин сайлагъандыла.
 Сабийле къоллары бла ишлеген затладан  а  лесной школну жыйылыула бардырылыучу залында кёрмюч къуралгъанды. Анда эшилген, тигилген, къагъытладан, журунладан, макаронладан, дагъыда кёп башха затладан ким да эс бурурча  ишле бар эдиле.
Конкурсну кезиуюнде  Зумакъулланы Танзиляны, Къулийланы Къайсынны, Фатимат Балкизованы, Анатолий Бицуевну, Агния Бартону, Расул Гамзатовну,  башха белгили поэтлени да назмулары орус, малкъар эм къабарты тилледе шатыкъ окъулгъандыла. Аланы айтханладан да бек игиле сайланнгандыла. Аланы араларында 5-чи  классдан  Рахайланы Тимур да болгъанды.
Ахырында уа тиширыуланы Нальчик шахар советини таматасы  Лидия Дигешева хапар жазгъанлагъа, назму окъугъанлагъа, жырлагъанлагъа, тепсегенлеге, сурат, башха затла ишлегенлеге да  саугъала, грамотала да бергенди. Мектепни директору Жаппуланы Лариса,  устазла  Шауаланы Ауалиятха, Елена Дзамиховагъа, Юлия Ногмовагъа, дагъыда башхалагъа  кёп махтау сёзле айтылгъандыла.