Кече - къарангы, машинала сюелирча жерле да аз

   Кёп болмай Битеуроссей халкъ фронтну (ОНФ)  Къабарты-Малкъарда келечилери «Жашау журт эм шахарда болум» деген проектни чеклеринде Нальчикде кемчиликле болгъан жерлени тинтгендиле. Специалистле асламысында социал объектлени тийрелерине, ол санда ала кече къалай жарытылгъанларына эс бургъандыла.
   Бу ишни эсеплерине  кёре, шахарны 1-чи номерли больницасыны аллында  Шортанов орамны Головко бла Балкарская орамла бла чекленнген кесегин кече жарытыу белгиленнген  мардалагъа келишмейди. Ол себепден ОНФ-ни келечилери жамауатны  тарыгъыуларын тюзге санагъандыла. Энди бу тийре чыракъла орнатыллыкъ жерлени тизмесине кирирге керекди.
Андан сора да, больницаны  къатында машиналагъа жер жетмегени, пассажир транспортха тохтаргъа онг болмагъаны да тохташдырылгъанды. Аны ючюн кёпле автомобильлерин жол юсюнде къоюп кетедиле, тротуарлагъа киредиле, башхалагъа чырмау саладыла.  Бютюнда ол шарт  ингир алада жунчутады.
   Активистле шахарны администрациясына тийишли мадарла этилирге кереклисин эсгертгендиле, деп айтылады ОНФ-ни КъМР-де бёлюмюню пресс-службасында.