Огъурлу ыз къойгъандыЖанхотия Басхан районда жангыз тау элди. Черекни сол жанында ариу ёзенде орналыпды. Кюнбатыш жаны уа – дуппурла, тёшле, сыртла. Ортасында уллу, кенг, ариу жол Минги таугъа дери барады. Бу элде къабартылыла да жашайдыла. Эки миллетни арасында тынчлыкъ, мамырлыкъ, ырахатлыкъ барды. Арада къыз берген, къыз алгъан тёре жюрюйдю. Бу хапарыбызда аллай бир юйюрню юсюнден айтайыкъ. Адам Таибович Хацуков 1915 жылда Заюковода туугъанды. Жанхотияда тёрт классны тауусханды. Андан сора Котляревская элде ФЗУ-да окъугъанды. Аны бошагъандан сора, 1935-1937 жыллада Киров колхозда эсепчи эди. Артда уа – Заюковода тюкенни таматасы. Анда бираз уруннгандан сора, алгъыннгы ишине къайтады. Ызы бла ол партиягъа киреди. Ол колхозда 1942 жылны 20 мартына дери ишлегенди. Ол кюн аны фронтха аладыла. Харьковну тийресинде сермешлеге къатышып, ауур жаралы болады да, госпитальда жатады. Уруш этерге саулугъу жарамай, аны аскер къуллукъдан эркин этедиле. Юйюне къайтхандан сора, Кёнделенде Виноградов атлы колхозда тамата эсепчи болады. 1945 жылда аны ол мюлкню партия организациясыны таматасына айырадыла. Юч айдан а Жанхотияда колхозчуланы жыйылыуунда «Эльбрус» колхозну правленини председателине сайланады. Хацуковну бу къуллукъда борчун толтургъаныны юсюнден райкомну секретары былай жазгъанды: «Адам Таибович ишин тынгылы бардырады. Партия жаны бла анга дау жокъду. Колхозчулары онунчу майгъа битеу сабанлагъа урлукъ себип бошагъандыла. Андан сора да, 4-чю къырал аскер заёмгъа 100 процент жаздыргъандыла. Адам кеси 3 минг сом бергенди. Муну башчылыгъында мюлк 1946 жылда къыралгъа 124 процент будай, 190 процент картоф ётдюргенди. Эллиле иели бахчаларындан да къыралгъа будай бергендиле». Бу адамны юсюнден республикалы газетледе да жазыла тургъанды. Ишден сора да, элни жумушу кёп эди. Председатель да алагъа тири къатышханды. Ишчилерине кёз-къулакъ болгъанлай тургъанды, бютюнда урушдан къайтханлагъа. Мал тутханнга бичен бла болушханды, юй-журт ишлегенлеге къурулуш материалла мажаргъанды. Юйлерине, уруннган жерлерине барып хапар айта, кёллерин алыргъа кюрешгенди. Адам анга буюрулгъан ишни ышаннгылы бардыргъанды. 1947 жылда 10 февральда чыкъгъан «Кабардинская правда» газетде республиканы 11 алчы колхозларыны санында «Эльбрус» мюлк да айтылады. Колхозну председателине КъМАССР-ни Президиумуну Баш Советини Сыйлы грамотасы да берилгенди. Таулула Азиядан къайтып тебирегенде, колхозда болгъан машиналаны, арбаланы алып, вокзалгъа барып, Кёнделеннге, Жанхотиягъа, Лашкутагъа адамланы келтиргенди. Ала юй-журт къайгъыларын бошагъынчы, къабарты юйлеге юлешгенди. Кесинде: Тебердиладан, Гудуладан, Жеттеладан юйюрле тутханды. Ата журтларындан зор бла кёчюрюлюп, онюч жылдан къайтханлагъа Эл советни председатели жер юлюшле бергенди, къурулуш материалла ташыргъа улоу бла болушханды. Ол адамланы туудукълары аны атын бюгюн да уллу хурмет бла эсгередиле. Юйюрюню юсюнден айтханда, байбийчеси Хажигуаша Шаова бла онбеш сабийлери болгъанды. Аладан онусу гитчелей ёлгендиле. Юч къызлары Къыралхан, Мачхан, Кишхан, эки жашлары Мухадин бла Бетал ёсгендиле, юйдегили болгъандыла. Ахыргъы Басхан-Азау жолда мастер эди. Анда къурулуш-ремонт ишлени бардыргъанды. 1991 жылда ажымлы жашауундан кетгенди. Эгечле да, юйюр жашаугъа берилип, ахшы къылыкълы сабийле ёсдюргендиле. Мухадин къыркъ алты жылны Терс-Къолда ишлегенди. Алгъа автобус жюрютгенди, артда гаражны таматасы болгъанды. Ахшы кёрюмдюлери ючюн ол кёп кере сыйлы грамотала, ахча бла да саугъалана тургъанды. Аны юсюнден «Горняцкая слава» газетде да жазылгъанды. Бюгюнлюкде пенсиядады, юй бийчеси Света Кармоковады. Аланы бир жашлары Султан Адыгеяда МЧС-ни таматасыды. Адам Таибовични таулула бла жууукълугъу болгъаныны юсюнден башында сагъыннганбыз. Аны бир эгечи Лиза да Лашкутадан Къартлыкъланы Хусейге эрге баргъанды. Бирси эгечи Фатимат Багъатырланы Жюнюс бла юйюр къурагъанды. Адам Хацуков ауушханда, дууасына кёп адам жыйылгъан эди. Тийреде элледен анга келмеген къалмагъанды. Игиле, ахшыла да кетедиле дуниядан. Алай аланы этген ишлери къаладыла. Аллайлагъа жамауат эл адамы дейди. Бу эр киши да аладан бири эди. Ол кеси заманында болушлукъ тапдыргъанла, аланы туудукълары бюгюн-бюгече да аны атын уллу хурмет бла эсгередиле.
Поделиться:
Читать также:
15.11.2026 - 11:00 →
Къыйынына – бийик багъа
15.11.2026 - 10:00 →
Мектеплени жангыртыу жаны бла иш тынгылы бардырылады
15.11.2026 - 09:00 →
Ашхананы къурулушу къыстауду
15.11.2026 - 08:30 →
Минги тауну этеклеринде лыжалада учхан кезиу башланнганды
15.11.2026 - 08:00 →
Узакъ эллеге – тынгылы жолла
| ||



