Тырныаууздан – майдалла бла

Элбрус районну администрациясындан билдиргенлерича, кёп болмай Тырныауузда «Геолог» спорт комплексде боксдан Республикалы ачыкъ турнир ётгенди. Анга 2012-2013 эм 2014-2015 жыллада туугъан жашла къатышхандыла. Эришиуле СССР-ни боксдан спортуну устасы, Аскерчилени арасында баргъан чемпионатда эки кере хорламгъа тийишли болгъан Текуланы Алимни хурметине жораланнганды. 

Даражалы турнирде  усталыкъларын кёргюзтюрге Нальчик шахарны, Хасания, Акъ-Суу,  Яникой, Кёнделен, Быллым, Огъары Басхан,  Элбрус, Терс-Къол,  Нейтрино эллени, Басхан,Терк, Май, Чегем районланы  спорт школларыны келечилери эм къоншу Чечен, Дагъыстан эм Ингуш республикаланы спортчулары келгендиле.

Алай бла эришиулени ахырында чыгъарылгъан эсеплеге кёре биринчи жерге Толгъурланы  Шамиль (28 кг), Моллаланы Исхакъ (32 кг), Гулаланы Алийхан (32 кг), Жаппуланы  Жабраил  (34 кг), Ёзденланы Аслан (34 кг), Балаланы Мансур (36 кг), Сулейман Цендилиани (38 кг), Байкъазыланы Къууанч (44 кг), Мусукланы Ахмат (46 кг), Малкъарланы Марат (50 кг), Ногъайлыланы Хасан (52 кг), Къудайланы Алим (63 кг) эм Дамир Пшуков (54 кг) тийишли болгъандыла. 

Жанатайланы Исхакъ (32 кг), Моллаланы Абдуллах (34 кг) бла Мухаммат (50 кг), Абдуллаланы Хамид (38 кг), Ёзденланы Ислам (48 кг), Ислам Дышеков (54 кг), Тимур Дейцев (34 кг), Джамболат Накани (66 кг) эм Тельман Доллаев (44 кг) экинчи, Къонакъланы Амир (48 кг) бла Хапаланы Амир (54 кг) ючюнчю жерле бла  саугъаланнгандыла.   

Эришиулен къурагъанланы оюмуна кёре быллай турнирледе  жаш боксчула, алчы жерле ючюн сермешгенлеринден сора да,  кеслерин сынаргъа, техникаларын игилендирирге эм жунчумазгъа юйренедиле.