Юйюр ипотеканы жангы излемлери

Россейни Финансла министерствосу юйюр ипотеканы жангыртылгъан излемлерин басмалагъанды. Энди аны процент ставкасы эмда ёлчеми юйюрде сабийлени санына эмда ала къайсы регионда жашагъанларына кёре боллукъду.

Бу ипотека сабийлери болгъан юйюрлеге себеплик этиу амалладан бириди. Быйыл 1 октябрьге дери аны хайырланнганла жашау журтну кредитге бир жылгъа 6 процент тёлеу бла алыргъа боллукъ эдиле. Бу амал акъылбалыкъ болмагъан сабийлери болгъан юйюрлеге берилгенди. Излем хар кимге да бирча эди: процент ставка, кредитни мардасы да сабийлени санына кёре болмагъандыла.

Ипотеканы жангы ишленнген юйде неда къолдан-къолгъа фатар сатып алгъанда хайырланыргъа боллукъ эди. Экинчи амал 6 жылы толмагъан неда 18 жылы толмагъан сакъат сабийи болгъан юйюрлеге берилгенди. Фатарны да аз юй ишленнген жерледе алыргъа боллукъ эди. Дагъыда юйюр ипотека бла иели юй сатып алыргъа жарайды, ол санда жер участкасы болгъан да.

Ол алай болсун, энди уа 1 октябрьден башлап не зат тюрленнгенди?

Биринчиден, бу кредитни процент ставкасы эмда ёлчеми юйюр къайсы регионда жашагъаны эм анда ненча сабий болгъаны бла байламлыды.

Сабийледен бирине окъуна жети жыл толмагъан эсе, регионлада (Москва бла Санкт-Петербург шахарладан эмда Москва бла Ленинград областьладан къалгъан) ма быллай ипотека алыргъа боллукъду:

- беш эм андан кёп сабий болгъан юйюрлеге 10 миллион сом 2 процентге;

- тёрт сабий болгъан юйюрлеге 10 миллион сом 4 процентге;

- юч сабий болгъан юйюрлеге 10 миллион сом 6 процентге;

- эки сабий болгъан юйюрлеге 8 миллион сом 8 процентге;

- бир сабий болгъан юйюрлеге 6 миллион сом 10 процентге.

Москвада бла Санкт-Петербургда жашагъан юйюрлеге ипотеканы мардасы алгъын 12 миллион сом эди. Бюгюнлюкде ол багъагъа алада фатар тапхан къыйыныракъ боллукъду. Аны ючюн кредитни ёлчеми алада эмда ол эки областьда да тюрленнгенди:

- беш эм андан кёп сабий болгъан юйюрлеге 18 миллион сом 4 процентге;

- тёрт сабий болгъан юйюрлеге 18 миллион сом 6 процентге;

- юч сабий болгъан юйюрлеге 18 миллион сом 8 процентге;

- эки сабий болгъан юйюрлеге 15 миллион сом 10 процентге;

- бир сабий болгъан юйюрлеге 12 миллион сом 12 процентге.

Жангы излем: кредитни алгъынча 30 угъай, 15 жылгъа тёлеп бошаргъа керек боллукъду.

Алгъынча не зат къалгъанды?

Юйюр ипотеканы хайырланып юй ишлерге неда аны къурулушун бошаргъа, жер юлюш алып анда жашау журт сюерге сюйгенлеге иги хапар барды: алагъа ставка тюрленмегенди, ары дери болгъаныча (сабийлени санына неда регионнга къарамай) 6 процентлей къалгъанды.

«Бир юйюрге бир ипотека» деген излем да алай къалгъанды: кредит келишимни юйюрден жаланда биреулен эталлыкъды. Ала кеслери да бир юйде жашаргъа керекдиле.

Бу программа ишлеп башлагъанлы (2018 жылда) бери аны эки миллиондан артыкъ юйюр хайырланнганды. Учуз багъасы бла алагъа 11 триллион сом багъасына кредитле берилгендиле.