Ёртен табийгъатха мюлклеге да хата салырчады

Жай бла кюз арты от тюшерге къоркъуулу кезиулеге саналадыла. Ол себепден Къабарты-Малкъарда от тюшюуге къажау-къутхарыу службаны келечилери жыл сайын профилактика ишни бардырадыла. Бютюнда жайда аслам эс бурургъа тюшеди. Аны кезиуюнде къоркъуусузлукъну жорукъларына юйретедиле эм эсгертиу буклетле да юлешедиле.

Белгилисича, къургъакъ къаудан терк къабынады. Жерге атылгъан тютюнден, кюн тюбюнде къызгъан мияладан, кир-кипчикни мыдыхындан эмда башха сылтауладан да уллу хата тюшеди. Заманында эс этилмесе, ёртен агъачлагъа, дачалагъа, эл мюлк жерлеге эм башха объектлеге да женгил кёчеди эм уллу къоранчла салады. Ол себепден къоркъуусузлукъ жаны бла жорукъланы бузмазгъа тийишлиди.

Бир-бирле жер юлюшлеринде жашил кырдык теркирек ёсерча къауданны кюйдюрюрге ашыгъадыла. Болсада жер байламлыкъла бла законодательствогъа кёре саламны, къауданны да кюйдюрюрге жарамайды. Аны хайырындан эсе табийгъатха эм адамгъа да хатасы уллу болады. Ол себепден бу жаны бла профилактика бардырылырча эл мюлк жерлени иелерине борч салынады.

Жашау журтла неда башха объектле орналгъан жерледе да бек сакъ болургъа тийишлиди. Тёгерек-башны тазалагъандан сора, багушну мекямладан элли метрден жууукъда жандырыргъа жарамайды. Аны бла бирге, ол кюйюп бошагъынчы къараргъа керекди. Жел ура эсе уа, ол жумушну башха кюннге кёчюрсе игиди.

Аны бла бирге керек кезиуде от ёчюлтюучю машина жашау журтну неда башха мекямны къалайына да жетерча болургъа керекди. Эм игиси – кир-кипчикни арбазда кюйдюрмей, тышына чыгъарып, контейнерге атса.

Арбазда отну ёчюлтюрча абериле болсала, бютюн аламатды. Сёз ючюн, сууу бла 200 литр чакълы сыйыннган чыккыр да жарарыкъды. Къауданнга от тюшюп, тёгерекге жайылып барса, аны терекни бутакълары бла уруп, юсюне жер неда юзмез атып ёчюлтюрге онг барды. Алай къорууларгъа онг табылмазлыгъы белгили бола башласа, созмай от ёчюлтюучю службагъа бу номерлеге сёлеширге тийишлиди: «01», «101» эм «112».

Къургъакъ хансны къоркъуусузлукъну эсге алмай кюйдюргенле Россейни Административ бузукълукъланы кодексине тийишлиликде жууапха тартыладыла, тазир да тёлейдиле. Инсанлагъа ол 10-20 минг сомду, къуллукъчулагъа – 30-60 минг, энчи предпринимательлеге – 60-80 минг, организациялагъа бла учреждениялагъа уа – 400 -800 минг.  Ёртен  уллу хатагъа келтирсе, РФ-ни  законодательствосуна тийишлиликде аманлыкъчыгъа  уголовный иш ачылыргъа да боллукъду. 

Эсге сала айтсакъ, юйде, табийгъатда да инсан эсли болургъа, жорукъланы бузмазгъа керекди. Ёртенлени 90 проценти адамны уллу кёллюлюгюнден неда ойламай этгенинден  боладыла.