Финанс окъуулулукъдан дерслеге къатышыгъыз

Россейни Банкы финанс окъуулулукъдан онлайн-халда дерсле бардырып башлагъанын билдиреди. Проектни жангы кезиуюне школчула (5-11 классла) эмда колледжлени бла техникумланы окъуучулары къатышыргъа боллукъдула, сессия кеси да быйыл 16 декабрьге дери бардырыллыкъды, дегендиле Банкны Къабарты-Малкъарда бёлюмюнде.

Бу башламчылыкъны чеклеринде финансла бла байламлы 29 темадан битеуда 800 чакълы дерс бардырыллыкъды. Ала бла толуракъ шагъырейленирге уа Финансланы жомакълы шахарында жашагъанла болушурукъдула. Ала окъуучуланы кибер-хыйлачыладан къорууланыргъа, энчи бюджет жарашдырыргъа, инвестицияланы эмда финанс технологияланы юслеринден билирге юйретирикдиле. Хар дерс да кесини жигитлери, борчлары эмда сейирлик затлары бла энчи бир таурух кибик боллукъду.

«Россейни Банкыны быллай дерслерине Къабарты-Малкъарда сейир не заманда да уллу болуучуду. Сёз ючюн, муну аллында ётген сессиягъа республикада битеу мектепле эмда колледжле къошулгъан эдиле. Дерслеге къатышханланы саны уа 49 мингнге жетгенди, - дегенди Банкны регионда бёлюмюню башчысыны орунбасары Балаланы Расул. - Бу жол а сабийлени жангы интерактив дерсле сакълайдыла. Аланы бир-бирлерине сабийле кеслери сёзлери бла жууап берирге боллукъдула. Школчуланы айтханларына уа жалгъан интеллект багъа берликди».

Дерслеге къошулургъа сюйгенлеге женгил амал барды. Сессиягъа къатышханлагъа, ол бошалгъандан сора энчи сертификатла берилликдиле: анкетаны толтургъанлагъа аларын электрон почталарына жиберликдиле.

Бу проектге юйден, класс неда къауум бла бирге окъуна къатышыргъа жарайды. Аны сайтына (https://dni-fg.ru/) кирип дерсле къачан ётериклерин билирге, экспертле жарашдыргъан информация эмда башха материалла бла шагъырейленирге, регистрацияны да ётерге боллукъду.