Музыканы жолу бла барады

Сабийни фахмулугъу гитчелигинден окъуна билинеди, деп абаданларыбыздан келген сёз барды. Улбашланы Болатда да аллай хунерликни алгъадан окъуна кёргендиле. Ол фортепианода согъуп беш жылында башлагъан эди. Бусагъатда анга 14 жыл болады, ол Нальчикни 9-чу номерли школунда окъуйду, Сабий музыкалы школгъа да жюрюйдю.

Болатны фортепианода согъаргъа юйренирге атасы Азамат элтген эди. Ол врачды, аны себепли адамны саулугъуна не зат жарарыгъындан ангылауу уллуду. Сёз ючюн, фортепиано ол мыйыны эки кесегини да бирча иги ишлеулерине себеплик этеди.

Жашчыкъны чыгъармачылыкъ жолу уа 2017 жылда башланнганды дерге боллукъду: ол заманда «Кюн шахар» сабий академияны «Жилтинчикле» ансамблине тюшген эди. Анда тири чыгъармачылыкъ иши ючюн грамота бла да саугъаланнганды.

Биринчи атламларындан сора уа кёп конкурслагъа къатышып, айырмалы болгъанды. Сёз ючюн, 2022 жылны май айында Ставрополь крайны Ессентукда бардырылгъан Искусстволаны эмда музыканы сабий школларына жюрюгенлени регион конкурсунда, 2023 жылны апрель айында сабий чыгъармачылыкъны Грозный шахарда ётген «Фахмулукъгъа жол» деген Х регионла аралы фестивали-конкурсунда, 2024 жылны май айында щендюгю эм халкъ чыгъармачылыкъны Железноводск шахарда баргъан «Премия Art Level» деген фестивали-конкурсунда   лауреатны 1-чи даражалы дипломлары бла саугъаланнганды.

2025 жылны октябрь айында Махачкъалада жаш фахмулуланы композитор эмда дирижёр, СССР-ни халкъ артисти Мурад Кажлаевге аталгъан «Бу жыр сеники бла меникиди» деген халкъла аралы фестивальларында да айырмалыланы санында болгъанды. Дагъыда ол айда Шимал Кавказны жаш фахмулуларыны Нальчикде бардырылгъан «Чыгъармачылыкъны бийикликлери» деген конкурсларында 1-чи жерни алгъанды.

Быйыл а «Умутландыргъанла» деген XXI халкъла аралы конкурсну баш саугъасына тийишли болгъанды.

Конкурсну юсюнден айта, Сабий музыкалы школну директору - КъМР-ни маданиятыны сыйлы къуллукъчусу Марита Хаупа ол Шимал Осетияны ара шахарында Пётр Ильич Чайковский атлы 1-чи номерли сабий музыка школунда ётгенин, жюриге Россей Федерацияны халкъ артисткасы, Мариин театрны филиалы - Шимал Осетия-Аланияны  операсыны бла балетини театрыны,  Мариин театрны Жаш опера жырчыланы академиясыны художестволу башчысы Лариса Гергиева башчылыкъ этгенин да билдиргенди.

- Конкурсха къатышханланы саны бир да болмагъанча кёп эди. Къыралны башха-башха регионларындан - Санкт-Петербургдан, Краснодар эмда Ставрополь крайладан, Къабарты-Малкъардан, Дагъыстандан, Шимал Осетиядан - 200-ден аслам адам келгенди. Ала талай номинацияда эришгендиле: «Фортепиано», «Къыл къобуз», «Агъач духовой инструментле» «Халкъ инструментле», «Жыр айтыу», - дегенди ол.

Ол билдиргенича, Улбашланы Болат сегизжыллыкъ къошакъ программа бла жетинчи классда окъуйду. Аны профессионал стажы 45 жыл болгъан бийик категориялы устаз Людмила Хаткутова юйретеди. «Людмила Ефимовна сабийлеринде табийгъат салгъан хунерлени ачыкълай биледи. Болат аны классында жетишимли болгъан жангыз окъуучу тюйюлдю. Болатны музыкадан эси кючлюдю. Макъамны не тюрлю халына да терк тюшюнеди», - дегенди Марита Хаупа.

 2026 жылда мартда Владикавказда «Умутландыргъанла» деген конкурсда хорлагъандан сора, Улбашланы Болатны Лариса Гергиеваны музыкалы къонакъ юйюне чакъыргъандыла эмда Конкурсну лауреатларыны Владикавказда Мариинский театрны филиалында - ариу залда ётерик концертлерине къошулургъа боллугъун билдиргендиле.  Болат Людвиг ван Бетховенни фортепианогъа 11-чи номерли сонатасын согъаргъа керек эди да, ол борчун аламат толтургъанды. Гран-прини иесича, анга экинчи чыгъарманы да - аламат дюгерли композитор Ацамаз Макоевни «Элегия-Адажио» пьесасын – согъаргъа буюргъандыла. Айтхылыкъ уста жашны фахмусуна бийик багъа бергенди – кеси къол салгъан музыкалы жыйымдыкъны саугъалагъанды.

Болатны не усталыкъ сайларыгъыны юсюнден айтыргъа алыкъа эрттеди. Аны атасы врачды, анасы юристди, жашчыкъ музыкант усталыкъны сайласа, сегизжыллыкъ курсну бошагъандан сора, тийишли колледжлеге киргенлеге къуралгъан факультатив тогъузунчу классда окъургъа боллукъду.