Кезиулю жукъгъан ауруу кенг жайылмазча

Къабарты-Малкъарда гриппден вакцинация бардырылып башланнганды. Кезиулю жукъгъан ауруудан  регионнга 192,5 минг чакълы  вакцина жиберилгенди. Ол иммунизация этилирге тийишли  халкъны 60 процентиди. Профилактика халда бардырылгъан иммунизация, кезиулю жукъгъан ауруу кенг жайылмазына себеплик этеди, деп билдиредиле КъМР-ни Саулукъ сакълау министерствосундан.

 Бу жол Россейни Саулукъ сакълау министерствосу  «Ультрикс Квадри», «Сови Грипп» эм  «Флю‑М» вакцинала  жибергенди.  Эсге сала айтсакъ, гриппден иммунизация «къоркъуулу къауумдан инсанлагъа: абаданлагъа,   ауурлукълары болгъан тиширыулагъа,   сабийлеге, саулукъ сакълауда, билим бериуде, транспорт эм коммунал жаны бла ишлегенлеге, юслеринден кетмеген ауруулары болгъанлагъа бегирек керекди. Прививканы жашагъан жерлеринде поликлиникада неда быллай жумушну тамамлагъан энчи пунктлада этдирирге онг барды.

Специалистле айтханнга кёре, вакцинация гриппден къыйын аурумазча эм сынамлы амалладан бирине саналады. Аны сентябрь-ноябрь айлада этдирсе бютюн игиди. Андан сора адамны иммунитети юч-тёрт ыйыкъны ичинде  кюч алады эм эпидемия сакъланнган кезиуде къорууларча болады.