Студентле Элбрус районда болгъандыла

Къабарты-Малкъар къырал университетни менеджмент, туризм эм къонакъбайлыкъ индустрия жаны бла институту къурап  «Туризмни ыйыгъы» деген аты бла бир къауум   экскурсия бардырылады. Аны кезиуюнде студентлеге  Элбрус районда предприятияланы, спорт  объектлени жокълап,  аланы ишлери бла   шагъырейленирча онг тапдырылады. 

Кёп болмай аллай жолоучулукъланы биринде  «Лига Экскурсоводов» деген битеуроссей конкурсда хорлагъан,  гид-экскурсовод,  КъМКъУ-ну устазы    Дарья Фролова башчылыкъ этип  жаш адамла Тырныауузда  болгъандыла.  Ол санда спорт комплексни жокълагъандыла,  вольфрам-молибден къазгъан комбинатны тарыхыны,  ишини юсюнден да  толу хапар билгендиле. Ызы бла бюгюнлюкде он жыл чакълы   жетишимли ишлеген «Асыл-Суу» деген  чабакъла ёсдюрген заводха да  чакъырылгъандыла. Мында асламысында  осётрла бла форельле ёсдюредиле эм икраны да жарашдырадыла.   Биригиуню баш чабакъчысы Астемир Балкаров къонакълагъа  производствону кезиуюнде  къаллай жумушла тамамланнганларыны юсюнден  толу хапар айтханды, сорууларына да  жууапла бергенди.

 - Элбрус район стратегия магъаналыды,  мында кеслери заманларында къуралгъан эки тюрлю индустрия бла шагъырейленирге онг барды. Биринчиси Тырныаууз  шахарны къуралырына себеплик  этген вольфрам-молибден къазгъан  комбинатды, башхасы  уа бюгюнлюкде жетишимли ишлеген чабакъла ёсдюрген заводду.  Экиси да промышленный  туризм жаны бла къыйматлыдыла. Бизни борчубуз аланы мурдорларында сейир туризм продуктла къураргъады,- деп билдиргенди «Туризм»  билим бериу программагъа башчылыкъ этген Байсолтанланы Лейля.

Эксурсияны ахырында студентле Тырныауузда   къаялагъа ёрлерге юйретген жерде  «Мультипич» альпинист маршрутну,  «Скалы России» битеуроссей фестивалны къурагъан инструктор Сергей Селезнёв бла тюбешгендиле.

Аны кезиуюнде  къонакъбай  скаладром  солургъа онг бергенден сора да, спортчулагъа жараула бардырыргъа ахшы  себеплик этгенин да билдиргенди.

Эсге сала айтсакъ,  менеджент, туризм эм къонакъбайлыкъ индустрия институтну башламчылыгъы бла  бардырылгъан  экскурсияланы кезиуюнде студентле предприятиялада болуп  не тюрлю иш бла кюрешгенлерин кеси кёзлери бла кёредиле, специалистле бла тюбейдиле, ачыкъ ушакъ бардырадыла.  Быллай амал, ич туризмни айнытхандан сора да,  жаш адамланы къарамларын кенгертирге,  усталыкъларына бла таукел болургъа да болушурукъду.