Магъаналы жол ишленеди

Новопавловск–Прохладный–Моздок жолну узунлугъу 7,6 километр болгъан кесегинде тынгылы жангыртыу ишле андан ары бардырыладыла.
Бу объект РФ-ни мурдорлу жолларыны санындады, кеси да Къабарты-Малкъар Республиканы бла Ставрополь крайны араларында транспорт байламлыкъны жалчытады, деп билдиргендиле Къабарты-Малкъарны Транспорт эмда жол мюлк министерствосундан.

Шёндю специалистле жолну ол кесегинде кёп тюрлю ишле бла кюрешедиле: бордюр ташланы орнатадыла, жанларын жарашдырадыла, жауун сууланы бир жанына кетерген амалланы да къурайдыла.

Дагъыда аны бир жеринде 225 метр узунлугъу болгъан кёпюр барды да, ол да жангыртылады. Специалистле анда тынгылы бетондан чыпынла ишлей турадыла, эски бурууланы да кетергендиле. Къысха айтханда, кёпюрню хар несин тынгылы къурарыкъдыла. Аны себепли анга ремонт этиледи деген угъай, ол толусунлай жангыдан ишленеди дерге тийишлиди.
Жолда эмда кёпюрде бар ишле «Жашаугъа инфраструктура» миллет проектни чеклеринде бардырыладыла. Министерстводан билдиргенлерича, ала быйыл кюзню ахырында хайырланыугъа берилирге керекдиле.