Аскер араны бошагъанлагъа – алгъышла

Къабарты-Малкъар къырал университетде Аскер окъуу араны биринчи выпускуна аталгъан къууанчлы жыйылыу болгъанды. Аскер хазырлыкъны программасын жетишимли бошагъан курсантлагъа билетле берилгендиле эмда ала РФ-ни Сауутланнган  кючлерини запасдагъы  къауумуна  алыннгандыла.

Жаш  адамланы КъМКъУ-ну битеулю  соруула жаны бла  проректору Мурат Гукепшоков алгъышлагъанды. «Мында билим алыу инсанны конституциялы борчуду, сиз а аны тийишли даражада  тамамлагъансыз. Мындан  арысында да университетни Аскер окъуу арасыны атын игилик бла  айтдырырсыз деп ышанабыз. Анга  тийишли  болгъаныгъыз да сёзсюздю. Бютюнда сизге къадар  биринчиле болур насыпны да бергенди.  Алгъышлайма, жетишимли, саулукълу да болугъуз», - дегенди.

КъМКъ-ну юйретиу иш жаны бла  управлениясыны таматасы, инсан-патриот жаны бла  тюшюндюрюу арасыны директору Герман Шевчук, жыйылгъанланы алларында сёлеше, байрамны жаш  адамлагъа  магъанасын  чертгенди. Мында жаш адамла алгъан сынам а, жаланда аскерде угъай, харкюнлюк жашаугъа да керекли ыз болгъанын да  ангылатханды.  Аскер кийимни жюрютюу да адамдан энчи ышанланы  излегенин да.

Ата-аналаны  атындан да кёпле  сёлешгендиле эмда араны  таматаларына бла устазларыны къауумуна ыспас сёзле айтхандыла. Ала офицерлени  тёзюмлюлюклерин эмда жаш адамлагъа тутхучлукъ этерге хазырлыкъларын чертгендиле,  курсантлагъа алгъан билимлерин бла сынамларын жашау жолларында тюз  хайырланырларына  ийнаннганларын билдиргендиле.

КъМКъУ-ну Аскер окъуу арасы 2024 жылда ачылгъан эди, ол РФ-ни  Правительствосуну оноууна тийишлиликде къуралгъанды. Анга  башчылыкъны подполковник Альберт Балахов этеди. Араны къуралыууну эмда биринчи  курсантланы  алыуну тагыларында да ол сюелгенди эмда насийхатчылыкъны жорукъларын бла низамларын жарашдырып, дайым да жаш адамлагъа кёз-къулакъ болуп, тутхучлулукъ этгенлей тургъанды. 

Бюгюнлюкде ара аскер-эсеп усталыкълагъа тийишлиликде билим береди. Аланы санында авиацияда тамата механикле, БПЛА-ланы  хайырланыу эмда алагъа ремонт этиу жаны бла  операторла, башхала да бардыла.