Жаш тёлюге сакъдыла

Лашкута элни Маданият юйюню жангы мекямы 2017 жылда хайырланыргъа берилгенди. Анга Акайланы Хыйса башчылыкъ этеди. Бусагъатда аны мурдорунда «Кёгала» миллет тепсеу къауум, «Уста къолла» кружок эм «Жаш гроссмейстерле» шахмат клуб ишлейдиле.

Сабийлени кавказ халкъланы тепсеулерине юйретген «Кёгала» миллет тепсеу къауумну юсюнден айтсакъ, аны таматасы Байзуллаланы Эллады. Сабийле Маданият юйню эмда районну башха махкемелерини тюбешиулерине терк-терк чыгъадыла, эришиулеге бла фестивальлагъа къошуладыла, алада алгъан да бир ненча грамоталары бла кубоклары да бардыла. 2025 жылда Георгиевск шахарда Хореография санатны «Хорламланы кезиулери» битеуроссей фестиваль-конкурсунда эки тепсеу ючюн ала эки сыйлы жерге тийишли болгъандыла, экисинде да 2-чи даражалы лауреатла болгъандыла.

«Уста къолла» кружокда уа Къартлыкъланы Земфира сабийлени кёп сейир затха юйретеди. «Биз кезиуден-кезиуге Маданият юйню уллу отоуунда кёрмючле къурай турабыз. Ары ата-анала сюйюп келедиле, сабийлери этген ишлеге къарайдыла, къууанадыла. Алай шёндю материалланы багъалары кётюрюлгенлерини сылтауундан, аланы эркин алыргъа онгубуз болмай, бираз къыйналабыз. Сабийле кеслери уа бери хар заманда да сюйюп келедиле.

Кружокга 22 сабий жюрюйдю, кёбюсюнде ала башланнган классланы окъуучуларыдыла. Кёп болмай мында къуралгъан урчукъланы кёрмючю да сабийлеге бек сейир кёрюннгенди. Урчукъ ийирирге бизни да юйрет деп да  тилегендиле ала», - дегенди Земфира Расуловна.

«Жаш гроссмейстерле» шахмат клубну таматасы Акайланы Хыйсады. «Шёндюгю жашауда сабийле кёбюсюнде телефонсуз болалмайдыла, алай бери да сюйюп келедиле. Фахмулу шахматистибиз да барды - Джаппуланы Батыр. Бюгюнлюкде бизге 13 сабий жюрюйдю», - дегенди ушагъыбызда Хыйса.

Дагъыда мында хар байрым кюн сабийлеге къарачай-малкъар тилде жомакъланы кёргюзтедиле. Уллу-гитче да ары сюйюп келедиле.  Арт заманда уа «Созвездие» кружокда сабийлени жырларгъа юйретип башлагъандыла.

Маданият юйню керекли материалла бла Элбрус районну жер-жерли администрациясы жалчытады. Дагъыда элледе маданият юйлени жалчытыу программагъа тийишлиликде 2025 жылда «Маданият» миллет проектни чегинде компьютер, колонкала, принтер эм башха керекли затла да алыннгандыла.

Акайланы Хыйса сабийлени сюйген, алагъа къайгъыргъан таматады. Жаш тёлюге кёп тюрлю амалла къураргъа итинеди, ала ишлерин мында тынгылы бардырыр ючюн, «Элбрус эм Басхан районла бла да байламлыкъ жюрютебиз. Сабийлерибиз бир бирге къонакъгъа сюйюп барадыла, саугъала алып да къайтадыла. Атала, анала да бизге бек болушадыла, бюгюнлюкде да ол тёре бизде жюрюйдю. Аны ючюн алагъа Маданият юйню ишчилерини атларындан ыразылыгъыбызны билдирирге излейбиз. 

Муратым а тюрлю-тюрлю эришиулеге асламыракъ чыгъаргъа онг болуп, сабийлени маданиятха сейирлерин бютюн къозгъаргъады», - дейди Акай улу. 
Къысха айтханда, Лашкута элни Маданият юйю гитче болса да, къыйматлы ишлейди. Ала элни жаш адамларыны айныуларына сакъ кёзден къарап, тамблагъы кюнюбюзге ышаныу бередиле.