Устазлары аны бла ёхтемленедиле

Бизни жаш тёлюбюз болмагъанча аламатды, акъыллыды, тамблагъы кюнюбюзге ышандырады. Лашкутачы жаш Ботталаны Къууанч Ростовну къырал медицина университетини Аскер юйретиу арасында 4-чю курсну студентиди. Сабийлигинден да медицинаны сайлап, муратына жетерге итинеди.

Бизни жаш тёлюбюз болмагъанча аламатды, акъыллыды, тамблагъы кюнюбюзге ышандырады. Лашкутачы жаш Ботталаны Къууанч Ростовну къырал медицина университетини Аскер юйретиу арасында 4-чю курсну студентиди. Сабийлигинден да медицинаны сайлап, муратына жетерге итинеди.

Къууанчны атасы Мусса бла анасы Загира жангыз жашларыны сайлауун бек жарата эдиле. Не жаны бла да анга билеклик этерге кюрешгендиле. Къууанч да мектепде жетишимли окъугъанды. Тогъузунчу классха жетгенлей, жашау ызында тохташып, керекли дерслени терен окъуп башлайды. Элде хар жумушха да жарай, жашауунда спортха да энчи жер бере, къалгъан заманын а толусунлай билимге жоралагъанды. Мектепде къырал сынауланы эсеплери белгили болгъанда, къагъытларын медицина жаны бла КъМКъУ-гъа, Ростовха да жибереди.

Кертисин айтсакъ, хар жай кезиуде сабийлени окъуугъа кириулери ючюн барыбыз да жарсып, эсепни тынгысыз болуп сакълайбыз. Къууанч кеси да алайыракъ эди. Бир ингирде уа, маллагъа къарай тургъанында, мени жигитиме Ростовдан бир полковник сёлешип, кеслерине окъуугъа чакъырады. Керекмиди айтыргъа ол сабийни къууанчын?!

Къагъытларын да жарашдырып, ыразылыгъын берип, аскерчи, врач да болаллыгъына чексиз къууаннганды. Ма алай бла Къууанч окъуугъа киреди. Аны ангылауунда, ол адамланы жашауларын къутхарыргъа, болушургъа керекли кезиуде кесин аямазгъа итинеди.

Школда окъугъан жылларында медицина бла байламлы эски китапланы табып, Интернет бла чекленип къалмай, сейирин къозгъагъан соруулагъа жууапла излегенди. Ол уллу кёллюлюк, эринчеклик муратына элтген жолунда чырмау боллукъларын, сабий болса да, ангылагъанды. Мында бокс бла кюрешип, эришиуледе алчы жерлеге тийишли болгъанды. Окъуугъа кире туруп да спорт жаны бла жетишимлери бийик болгъандыла. Аскерчилик бир кесек сагъышландыргъан да этген эди аны. Белгилисича, ол низамны, тизгинлиликни къаты излеген, кесине кеси эркинлиги болмагъан аллай жашауду. Болалырмамы мен а, деген сагъышла да кезиуден-кезиуге келе эдиле жашны акъылына. Алай юйюрю, къаршылары да аны кеси кючюне ийнандыргъандыла. Бюгюнлюкде Къууанч бу жолну сайлагъанына сокъуранмайды. Не къадар теренирек окъуй, билим ала барса, ол къадар бегирек жаратады айыргъан усталыгъын.

- Окъуу ол жаланда дерсле тюйюлдю. Ол тохтаусуз иш бардырыуду, низамынгы кючлеудю, тёзюмюнгю беклеудю, дейди жаш кеси, - деп алай хапарлайды бизге Къууанчны анасы Загира.

Ботта улу быйыл присягагъа хазырланады. Устазлары бла таматалары аны тюз оюмлай билиуюн, хунерлилигин, ачыкъ жюреклилигин белгилеп айтадыла. Биргесине окъугъан тенглери уа анга не заманда да ышаныргъа боллугъу ючюн багъалайдыла таулу жашны. Юйретиу дерследе аны бир заманда да апчымай, къоркъмай, нени да тюз ангылап этгенин чертедиле. 

Эки жылдан бери Къууанч теорияда алгъан билимин Ростовну жукъгъан ауруулагъа бакъгъан арасында медбрат болуп бегитеди, аны бла жаш адам сынамын да ёсдюреди.
Ата журтунга къуллукъ этиу – ол къайда болсанг да, не болумлагъа тюшсенг да, сайлагъан ишинги тынгылы, жууаплы жалчытыуду, деп юйретгендиле жашны сабийлигинден да юйюрюнде, ол сёзле не заманда да аны эсинде ышаннгылы мурдор болуп сакъланнганлай турадыла. Ботталаны Муссаны жашы Къууанч бюгюнлюкде аскер кийимледеди, алыкъа уа алда аны акъ халаты да сакълайды, жамауатны жашауун къорууларча, саулугъун сакъларча.